Otyrysta komıssııa tóraǵasy Nurlan Ábdirov saılaý ótetin óńirlerdi aralaý bastalǵanyn málimdedi. Onyń aıtýynsha, saılaý komıssııalaryna ádistemelik-praktıkalyq kómek kórsetý úshin Ortalyq saılaý komıssııasynyń músheleri ınspeksııalyq saparmen barlyq 17 óńirdi aralaýdy bastaǵan. Atap aıtqanda, Aqmola, Almaty, Atyraý, Jetisý, Qaraǵandy, Qyzylorda, Pavlodar, Soltústik Qazaqstan, Shyǵys Qazaqstan oblysy men osy óńirlerdiń 24 qanatqaqty aýdan men oblystyq mańyzy bar qalalaryn aralap, saılaýdy ótkizýge daıyndyq barysymen tanysty.
– Saılaý úrdisinde týyndaıtyn máseleler boıynsha túsindirmeler men tájirıbelik keısterdi taldadyq. Inspeksııalyq saparlar barysynda jergilikti jerlerde aýdandyq aýmaqtyq saılaý komıssııalary ýchaskelik saılaý komıssııalarynyń músheleri úshin uıymdastyratyn kaskadtyq ádispen ótkiziletin oqý semınarlarynyń sapasyn baqylaý máselelerine erekshe kóńil bólinedi, – dedi OSK tóraǵasy.
Kandıdattardy tirkeý 16 qyrkúıekte bastalyp, 5 qazanǵa deıin jalǵasty. Tartysqa túsýge nıet bildirgenderdiń 36 paıyzynan kóbi saıası partııalardyń músheleri. Jalpy úmitkerlerdiń ortasha jasy – 47. Basym bóligi er azamattar.
– Bir orynǵa eń joǵary básekelestik – Jambyl oblysynda (Jýaly aýdany), Jetisý oblysynda (Kerbulaq aýdany), Túrkistan oblysynda (Báıdibek aýdany) 9 úmitkerden, eń azy – 3 úmitker Aqmola oblysynda (Jaqsy aýdany), Atyraý oblysynda (Isataı aýdany), Batys Qazaqstan oblysynda (Qaratóbe aýdany), Qostanaı oblysynda (Altynsarın, Denısov, Qarabalyq aýdandary). Ortasha eseptegende bir orynǵa bes úmitker talasady. Dálirek aıtqanda, bir orynǵa 5,53 úmitker bar. Usyný barysynda barlyq tirkelgen jeti saıası partııa óz belsendigin kórsetti («Aq jol» QDP, Amanat, «Aýyl» HDPP, Baıtaq, JSDP, QHP, «Respublica»). Úmitkerlerdiń eń kóbi – 35 pen 55 jas aralyǵynda – 68,27%. Eń eresek úmitker Atyraý oblysynyń Qyzylqoǵa aýdanynda – 62 jasta, eń jas úmitker Batys Qazaqstan oblysynyń Tasqala aýdanynda – 27 jasta. Kandıdattardyń arasynda 13 áıel bar. Saıası naýqanǵa túsýge úmitkerlerdiń 63,05 paıyzy memlekettik qyzmetshiler 9,64 paıyzy bıýdjet salasynyń qyzmetkerleri, 14,86 paıyzy kommersııalyq qurylymdarda jumys istese, 0,8 paıyzy saıası partııalarda jáne ÚEU-da tirkelgen, al 6,8 paıyzy ýaqytsha jumyssyz. Qalǵandary túrli salalarda eńbek etip júrgen azamattar. Usynylǵan kandıdattardyń arasynda ekonomıster – 21,69, zańgerler – 19,28, oqytýshylar – 14,46, ınjenerler – 13,6, aýyl sharýashylyǵy – 9,64, al 21,28 paıyzy basqa mamandyq ókilderi, – dedi Ortalyq saılaý komıssııasy tóraǵasynyń orynbasary Konstantın Petrov.
Sondaı-aq ol kandıdattardy usyný qorytyndylary boıynsha barlyq aqparat tıisti aýmaqtyq saılaý komıssııalarynyń saıttarynda, al óńirler boıynsha siltemeleri bar jıyntyq aqparat Ortalyq saılaý komıssııasynyń saıtynda jarııalanatynyn aıtty. Osyǵan deıingi basqosýda aýmaqtyq saılaý komıssııalarynyń tóraǵalaryna kommýnıkasııanyń túrli arnalary arqyly saılaý úderisine barlyq qatysýshylardyń saıası naýqan týraly aqparatqa qoljetimdiligin qamtamasyz etip, aqparattyq qoldaý máselelerin turaqty ári jeke baqylaýda ustaý tapsyrylǵan bolatyn. Buǵan tıisti ýákiletti organ men jergilikti atqarýshy organdar kómek kórsetýge tıis. Osy rette OSK múshesi Anastasııa Shegorsova ákimderdiń saılaýy ótip jatqan barlyq óńirde daýys berý kúni týraly aqparattyq bannerlerdiń ornalastyrylǵany jáne jergilikti televızııalyq BAQ efırinde aqparattyq naýqannyń bastalǵany týraly baıandady.
– Biz kún saıyn aqparattyq keńistikke monıtorıng júrgizemiz. Iаǵnı 42 aýdan men 3 qala ákimin saılaý naýqany týraly aqparattyń qalaı júrgizilip jatqanyn qarastyramyz. Apta saıyn osy aqparattardy taldaý jasap, qorytyndylaımyz. Azamattardy saılaý naýqany týraly habardar etý úshin Ortalyq saılaý komıssııasy úsh aqparattyq beınerolık ázirledi. Olardyń ekeýi naýqan kezeńderine sáıkes jergilikti telearnalarda kórsetilýi úshin óńirlerge jiberildi. О́kinishke qaraı, jergilikti tele jáne radıo arnalardyń barlyǵynda bul baǵyttaǵy jumystar joǵary deńgeıde emes. Kúnine orta eseppen 9 kórsetilim. Eń azy Abaı oblysynda – 4 shyǵarylym. Sondaı-aq Atyraý, Almaty, Jambyl, Mańǵystaý oblysynda radıoda belsendi júrip jatqan joq. Batys Qazaqstan jáne Ulytaý oblysynda táýligine 20 kórsetilim jáne Shyǵys Qazaqstan men Pavlodar oblysyndaǵy radıoda 36 jáne 26 shyǵarylym júrýde. Bul – jaqsy kórsetkish, – dedi Anastasııa Shegorsova.
Jıynǵa onlaın baılanysta oblystardyń aýmaqtyq saılaý komıssııalarynyń tóraǵalary men músheleri, saıası partııalardyń, buqaralyq aqparat quraldarynyń ókilderi qatysty. Otyrys qorytyndysynda komıssııa tóraǵasy aımaqtarǵa bul baǵyttaǵy jumysty kúsheıtýdi jáne kandıdattarǵa úgittik baspa materıaldaryn ornalastyrý úshin jetkilikti oryn berýdi tapsyrdy.
Saılaý naýqanynyń negizgi merziminde kandıdattardy usynýǵa 20 kún, kandıdattardy tirkeýge 25 kún qarastyrylǵan. Kandıdattardy tirkegennen keıin birden saılaýaldy úgit-nasıhat jumystary bastalady.
