«Samruk-Kazyna Construction» AQ basqarma tóraǵasy Máýlen Aımanbetov Qaraǵandy oblysyna barǵan saparynda «Jaıly mektep» jobasynyń júzege asyrylý barysyn tekserdi. Qaraǵandy óńirinde joba aıasynda 18 mektep salynady. 10 jaıly mekteptiń qurylysy bıyl bastalyp, 2024 jyly paıdalanýǵa berilýge tıis. Qalǵan 8 mektep 2025 jylǵa josparlanǵan. Ulttyq jobanyń nátıjesinde oblys boıynsha 12,5 myń qosymsha oryn ashylady.
Alaıda «Astana-Kóktem S» kompanııasy jaýapkershilik alǵan Buqar jyraý aýdany Úshtóbe aýylyndaǵy 300 oryndyq jáne «AN Groups» kompanııasy salýǵa tıis «Golýbye pýdy» shaǵyn aýdanyndaǵy 1 200 oryndyq jaıly mektepterdiń jumystary óte aqyryn júrip jatyr. Atalǵan merdigerlerge qatań eskertý jasaldy.
– Qurylysqa daıyndyq jumystary men tehnıkany jumyldyrý qarqyny álsiz. Jumysty eki aýysymda uıymdastyryp, barlyq úderisti jedeldetip, qosymsha tehnıka jumyldyryp, mamandar men jumysshylardy kóbirek tartý kerek. Bekitilgen merzimderdi qýyp jetpeseńizder, kelisimshartty buzýǵa týra keledi. Qujattardy ýaqytynda tapsyrýy kerek. Eger jaqyn arada jaǵdaı túzelmese, barlyq atqarýshylyq qujattamany retke keltirmeıinshe jumystardy toqtatýǵa májbúr bolamyz. Eski jumys tásilderinen bas tartyńyzdar, bári erejege sáıkes bolýǵa tıis. Sondaı-aq jumys barysyn jedeldetip, eki aýysym uıymdastyrý kerek, óıtkeni qys jaqyndap keledi, – dedi M.Aımanbetov.
«Samruk-Kazyna Construction» basshysy Ǵ.Mustafın aýylyna qarasty Nura stansasyndaǵy mekteptiń qurylys jumystaryn toqtatýǵa buıryq berdi. Sebebi onda geologııalyq zertteýler júrgizý kezinde kemshilikter ketken. Sondaı-aq ol «Gúlder» shaǵyn aýdanyndaǵy «Stınk TFK» kompanııasy salyp jatqan 1 200 oryndyq jaıly mekteptiń qurylys alańynda bolyp, mektep ýchaskesiniń aýmaǵy tar ekenin, bilim oshaǵynyń kireberis keń bolýy keregin atap ótti. Al «BiGlobal» JShS salatyn «Keń dala» shaǵyn aýdanyndaǵy 2 000 oryndyq jaıly mekteptiń sport alańyn talaptarǵa saı jaraqtandyrý úshin aýmaqtyń bas josparyn qaıta qaraýdy tapsyrdy.
