Sergeldeńge salǵan esirtki

On toǵyz jastaǵy eki boıjetkenge aldyn ala sóz baılasqan bir top adammen birigip asa iri kólemdegi esirtki zattaryn zań­syz ıemdengen, tasymaldaǵan, saqtaǵan, ony elektrondy aqparat kózderi arqyly satpaq bolǵan degen aıyp taǵylyp otyr. Sot olardyń ótken jyldyń qyr­kúıegi men osy jyldyń qań­tary aralyǵyndaǵy kezeńde Qostanaı áleýmettik-tehnıkalyq kolledjiniń 3-kýrsynda oqı júrip, esirtki zattaryn zańsyz ıemdengenin, saqtaǵanyn jáne ony satý úshin Qostanaı qalasy­nyń ár buryshyna tasymaldap, aldyn ala belgilengen qupııa oryndarǵa jasyryp qoıyp ketip otyrǵanyn anyqtady.

Kolledj stýdentteri An­ge­lına Antıpenko men Anas­tasııa Savostıanova birge páter jaldap turǵan. Arnaıy saıt arqy­ly beıtanys operatormen baı­lanysqan Angelına oǵan jeke kýáligindegi málimetterin ózi jiberip, esirtki tasymaldaýmen aınalysýǵa keli­sim bergen. Odan keıin bul isine qur­bysy Anastasııany tart­qan. Boı­jetkenderdiń ózderiniń aıtýyn­sha, olardy mundaı aýyr qylmysqa barýǵa buryn ózde­rimen birge turǵan Marııa Ermakova esimdi boıjetken ıtermelegen. Qaryzǵa alǵan azyq-túligi men kommýnaldyq qyzmet aqysyn tóleı almaı tyǵyryqqa tirelgen stýdentter Marııa Er­ma­ko­vanyń «Senderdi eshkim esh­qashan ustaı almaıdy, qaıta qaryzdaryńnan qutylyp, paıda tabasyńdar», degen sózine senip, kelisim bergen kórinedi.

Osylaısha, beıtanys operator eki stýdentke habarlama ar­qyly esirtki jasyratyn oryn­dy kórsetedi. Tapsyrmany oryndaǵan soń qyzdar ózderi esirtki jasyrǵan oryndy sýretke túsirip, skrınshotyn álgi operatorǵa jiberip otyrǵan. Stýdentter atqarǵan jumystyń árqaısysy myń teńgeden bir jarym myń teńgege deıin baǵalanǵan. Antıpenko men Savostıanova birazdan soń bul «bıznesten» bas tartpaq bolǵan eken, alaıda olardyń áleýmettik jeli arqyly jumsap, tabysqa keneltip otyr­ǵan «jarylqaýshysy» «or­man­ǵa aparyp kómip ketemiz, ja­qyn týys­taryńdy jazalaımyz», dep qorqytqan.

Polısııa stýdentterdi 2023 jyldyń 11 qańtarynda kóp­qa­­batty bir úıdiń kireberisine esirtki jasyryp jatqan jerinen ustady. Boıjetkender esirtkini kóbine osyndaı kópqabatty úı­ler­diń kire berisiniń kózden tasa bir buryshyna nemese poshta já­shiginiń ishine tastap ketip otyr­ǵan.

Qyzdardyń jeke basyn tintý barysynda A.Savostıanovanyń ústindegi kúrteniń oń qaltasynan – 20, sol qaltasynan 30 túıinshek aq tústi untaq zat shyqqan. Odan keıin stýdentter turyp jat­qan jal­damaly páterge tintý júr­giz­gen polısııa salmaǵy 100 gr «Mefedron» esirtkisi salyn­ǵan plastıkalyq tárelke, elek­trondy tarazy, eki uıaly telefon, barsetkaǵa salynǵan 12 túıin­shek esirtki jáne esirtki sa­­lýǵa yń­ǵaıly kóptegen ZIP pa­ke­tin tap­qan.

Oblystyq polısııa departa­menti esirtki qylmy­sy­na qarsy is-qımyl basqarmasynyń aǵa jedel ýákili, polısııa podpolkovnıgi Aıgúl Erádilovanyń aıtýynsha, sotqa deıingi tergeý jumystary ba­rysynda stýdentter jaldap tur­ǵan páterden tárkilenip alynǵan aıǵaqtardyń «Ideıa» ınternet dúkeninen satyp alynǵany anyqtalǵan. Bul zattardy belgisiz bireýler Petropavl qalasyndaǵy qupııa oryndarǵa qaldyryp ketip otyrǵan. Odan ári «Ideıa» telegram dúkeni arqyly ózge óńir­lerge taratpaq bolǵan. Qos­ta­naı­da taralǵan esirtki – sonyń bir ushyǵy ǵana.

Ashyq sot otyrysynda prokýror sottalýshylarǵa 11 jyl bas bostandyǵynan aıyrý jazasyn taǵa­ıyndaýdy suraǵan. Alaıda qyl­mystyq jaýapkershilikti je­ńil­detetin birqatar jaıtty eskergen sot boıjetkenderdi 10 jylǵa bas bostandyǵynan aıyrý týraly úkim shyǵardy. Sot úkimi áli zańdy kúshine ene qoıǵan joq.

Polısııa departamentiniń má­li­metinshe, esirtki qylmysyna qarsy kúres basqarmasynyń qyz­­metkerleri jyl basynan beri zańsyz esirtki aınalymyna qa­tys­ty 237 qylmysty anyqtap, 340 kg esirtki zattaryn tár­ki­le­gen.

Qostanaı oblysy