Halyqaralyq baǵdarlamalar ortalyǵynyń baspasóz qyzmeti habarlaǵandaı, olardyń 12-si Haıfa qalasynda, qalǵandary elimizdiń basqa qalalaryndaǵy oqý oryndarynda bilim alyp jatyr.
«Búgin olar elge oralady. Oqytýdy jalǵastyrý máselesi áli de ashyq», delingen habarlamada.
Esterińizge sala keteıik, búgin saǵat 08:00-de «Air Astana» ushaǵy Almatydan Tel-Avıvke ushty. Bortynda Qazaqstan azamattary bar keri reıs Almatyǵa jergilikti ýaqyt boıynsha shamamen 23:45-te keledi.
Aıta keteıik, Palestınalyq HAMAS tobynyń senbi kúni bastalǵan Izraılge shabýyly men eldiń soǵys jaǵdaıyna ený tusynda birqatar memleketter Izraılden azamattaryn evakýasııalaýdy uıymdastyrýǵa asyǵyp jatyr.
Qazirgi ýaqytta Izraıl armııasy Gaza sektoryndaǵy HAMAS pozısııalaryna shabýyldaryn jalǵastyryp jatyr. Áskerıler Palestına turǵyndaryna Mysyrǵa qashýǵa keńes beredi.
Arab memleketteri lıgasy 11 qazanda Gaza sektoryndaǵy jaǵdaıǵa baılanysty shuǵyl jıyn ótkizetini belgili boldy.
Sonymen qatar QR Syrtqy ister mınıstrliginiń resmı ókili Aıbek Smadııarov mınıstrlik messendjerde arnaıy chat qurǵanyn, onyń quramyna Izraılde ýaqytsha jáne turaqty turatyn 200-ge jýyq Qazaqstan azamaty engenin aıtty.
Syrtqy ister mınıstrliginiń málimetinshe, Gaza sektorynda 25-ke jýyq qazaq otbasy ómir súredi.
