Is-sharany «Januıa» otbasy ınstıtýtyn qoldaý ortalyǵy men Astana qalasy ákimdiginiń janyndaǵy Áıelder isteri jáne otbasylyq-demografııalyq saıasat jónindegi komıssııasy birlesip uıymdastyrdy. Oǵan Áıelder isteri jáne otbasylyq-demografııalyq saıasat jónindegi ulttyq komıssııa músheleri, qalalyq máslıhat depýtattary jáne kópbalaly otbasylar qatysty.
«Qazirgi ekken tal-shybyq, erteń japyraǵy jaıqalǵan aǵash, odan ári kórikti orman bolatyny belgili. Osydan birneshe jyl ótken soń bul aǵashtardyń saıasyn nemere-shóberelerimiz kóredi. Dana qazaq «Atadan mal qalǵansha, tal qalsyn», dep aǵashtyń adamzatqa berer paıdasyn erekshe atap ótken», dedi Astana qalasy ákimdigi janyndaǵy Áıelder isteri jáne otbasylyq-demografııalyq komıssııasynyń hatshysy Qarlyǵash Sarkenova.
Aıta keteıik, «Januıa» ortalyǵy – kópbalaly, tolyq emes, jaǵdaıy tómen otbasylarǵa, múgedek bala tárbıelep otyrǵan otbasylarǵa jáne múgedektigi bar jandarǵa keshendi keńes berý qyzmetterin kórsetý, otbasy ınstıtýtyn nyǵaıtýǵa baǵyttalǵan sharalardy uıymdastyrý maqsatynda jumys isteıdi.
«Butaq jaıǵan aǵash qartaımaıdy, urpaq jaıǵan adam qartaımaıdy», deıdi halqymyz. Keıingi kezde aǵash egý dástúri elimizdiń túkpir-túkpirinde qolǵa alynyp jatyr. Osy oraıda «О́z aǵashyńdy otyrǵyz» atty áleýmettik aksııanyń mańyzy zor. Bul aksııaǵa ortalyqtyń súıemeldeýindegi 20-dan astam kópbalaly jáne múgedektigi bar balalardy tárbıeleýshi otbasylar qatysty», deıdi Astana qalasy ákimdiginiń «Januıa» otbasy ınstıtýtyn qoldaý ortalyǵy dırektory Bahtııar Aıtpaev.
«Is-sharanyń basty maqsaty – ómirdiń qıyn jaǵdaıyna tap bolǵan otbasylardaǵy balalardy ekologııalyq tárbıeleý arqyly ata-ana men bala arasyndaǵy qarym-qatynasty nyǵaıtý, ortaq iste otbasynyń birligin damytý, balalardy eńbekke baýlý, qorshaǵan orta men tabıǵatty aıalaý ár adamnyń jaýapkershiligi ekenin sezindirý», deıdi uıymdastyrýshylar.
Igi iske qatysýshylar bir mezette 70-ke jýyq aǵash otyrǵyzdy. Jer bólip, aǵash otyrǵyzýǵa Saryarqa aýdanynyń ákimdigi qoldaý kórsetti.
