Qaǵbanyń jamylǵysy ár dáýirde túrli túste bolypty. Muhammed paıǵambar ony Aq Iemen matasymen japqan. Bizdiń qazirgi kórip júrgen qara tústi jabý 749-1258 jyldary Arab halıfatyn bılegen – Abbasıdterden (Muhammed paıǵambardyń nemere aǵasy Abbas ıbn Abdýl-Mýttalıbten taraǵan) bastaý alǵan.
Jamylǵyny jylyna bir ret ıslam kúntizbesi boıynsha Zýl-Hıdja aıynyń (qajylyq aıy) 9/10 kúni aýystyryp otyrady. Arapa kúni, ıaǵnı Qaǵbada qajylar bolmaıtyn ýaqytta eski qısýa jańartylady. Jylyna bir mezgil qajylyq saparǵa barǵandar Qaǵbany kózimen kórip, alaqandarymen sıpap, oǵan qol tıgizip qana qoımaı, múmkindik bolsa, qısýadan tutamdaı bolsa da tábárik alyp qaıtady.
Mýzeıdiń aǵa ǵylymı qyzmetkeri Meıramgúl Shaıahmetqyzynyń aıtýynsha, 1892 jyly Málik Ǵabdýllınniń arǵy atalarynyń birine qasıetti Qaǵbanyń osy tábárigi buıyrǵan. Qısýany akademıktiń ákesi Ǵabdolla qarııa qasterlep ustap, jaınamaz retinde paıdalanǵan. 1995 jyly mýzeı ashylǵanda batyrdyń uly Battal men nemeresi Ársen ony mýzeı qoryna tapsyrady. Qazir qundy jádiger mýzeıdiń «Uıadan ushyp qııaǵa samǵaǵan» atty ekspozısııalyq zalynyń tórinen oryn alǵan.
