Týrnırdiń maqsaty – jastardyń zııatkerlik alańyn qurý jáne olardyń Memleket basshysynyń Joldaýyn júzege asyrýda, nasıhattaýdaǵy belsendiligin arttyrý. Sondaı-aq is-shara qoǵamdyq kelisim men jalpyulttyq birlikti nyǵaıtýdy kózdedi. Izgi iske Qazaqstan halqy Assambleıasy men «Assambleıa jastary» respýblıkalyq qoǵamdyq birlestigi jáne «Ulttyq pikirsaıys federasııasy» respýblıkalyq qoǵamdyq birlestigi uıytqy boldy.
– Debatta pikirsaıystyń túrli formaty qoldanyldy. Atap aıtsaq, amerıkalyq, brıtandyq jáne prezıdenttik format. Tartysty básekege barlyǵy 40 adam qatysty. Bul týrnırdiń ereksheligi – ár 20 komandanyń bir ókili basqa etnostan bolýy mindetteldi ári is-shara tolyqtaı qazaq tilinde ótti. Oıyn barysyna 10 adam tórelik etti, – dedi Ulttyq pikirsaıys federasııasynyń prezıdenti Bek-Muhamed Jáýkebaev.
Respýblıka kúnine oraı uıymdastyrylǵan pikirsaıysqa jasandy ıntellektiden keletin qaýip qater men neırojelilerdi qarjylandyrý taqyryptary negiz boldy. Týrnır aıasynda qatysýshylar Parlament Senatynyń tóraǵasy Máýlen Áshimbaev jáne Assambleıa tóraǵasynyń orynbasary – Hatshylyq meńgerýshisi Marat Ázilhanovpen kezdesti. Palata Tóraǵasy talantty jáne bilimdi jastardy qoldaýdyń mańyzy zor ekenin aıtty.
– Jas býyn eldi jańǵyrtý jáne Ádiletti Qazaqstan qurý isinde qozǵaýshy kúsh retinde aıryqsha ról atqarady. Sondyqtan Memleket basshysy óz Joldaýynda elimizde bilim berý sapasyn arttyrý máselesine únemi basa mán berip keledi. «El birligi» debat saıysyn ótkizý memlekettik tildi damytýǵa jáne onyń qoldanylý aıasyn keńeıtýge aıtarlyqtaı úles qosady. Senat tarapynan mundaı bastamalarǵa árdaıym qoldaý kórsetemiz. Qazaqstan halqy Assambleıasynan saılanǵan senatorlar da bul baǵytta belsendi jumys isteıdi. О́ıtkeni el birligin nyǵaıtý jáne memlekettik tildiń ultty uıystyrýshy rólin arttyrý arqyly qoǵamdyq kelisimdi saqtaý – bizdiń ortaq maqsatymyz, – dedi Máýlen Áshimbaev.
Sondaı-aq Senat tóraǵasy palatanyń jastardy qoldaý baǵytynda atqaryp kele jatqan jumystaryna toqtaldy. Memlekettik basqarý isine jas býyndy tartýdyń, tıisti jobalar men zańnamaǵa ózgerister engizý arqyly olardyń azamattyq áleýetin jandandyrýdyń mańyzdylyǵyna da nazar aýdardy. Buǵan qosa ol Senat janyndaǵy Jas sarapshylar klýbynyń jáne Taldaý mektebiniń qyzmetine sholý jasady.
Jalpy, Assambleıa mundaı pikirsaıys týrnırin alǵash ret uıymdastyrǵan. Respýblıkalyq debat qorytyndysynda I oryn Dáýlet Núrken men Elına Amýrlaevaǵa buıyrdy. Júldeli II oryndy Jaqsylyq Bekhan men Týrsýnhodjaev Bohromjan aldy. III oryndy Slambek Elemes pen Dıana Habıbýlına mise tutty. Budan bólek Áset Ahmedov «Úzdik medıa» atalymyn jeńse, Isahan Nurbaqyt «Úzdik spıker» dep tanyldy. Júzden júırik, myńnan tulpar atanǵandarǵa maqtaý qaǵazdary men baǵaly syılyqtar úlestirildi.
