Bıyl Shákárim Qudaıberdiulynyń týǵanyna – 165, Halel Dosmuhamedulynyń týǵanyna – 140, sondaı-aq Maǵjan Jumabaı men Sultanmahmut Toraıǵyrulynyń týǵanyna 130 jyl toldy. Elimizde atalǵan tulǵalardyń mereıtoılary da shama-sharqynsha atalyp ótildi. Osy is-sharaǵa oraılastyrylǵan saıystyń maqsaty – el táýelsizdigi jolynda kúresken Alash qaıratkerleriniń aǵartýshylyq baǵyttaǵy eńbekterin nasıhattap, jas urpaqtyń boıyna otansúıgishtik pen ulttyq qundylyqtardy qurmetteý, ana tilimizdi ardaqtaý sekildi asyl qasıetterdi sińirýdi kózdegen.
Zııatkerlik saıysqa kindik qalanyń 18 orta mektebinen bilimmen bes qarýyn saılap kelgen oqýshylar qatysty. Olar aldymen «Ultqa qyzmet – ár qazaq balasyna mindet» atty sahnalyq qoıylym kórsetti. Odan keıin «Alash arystaryna hat» dep atalatyn ekinshi kezeńde monolog oqydy. Oqýshylar Alash ardaqtylaryna arnap jazǵan hattarynda azat eldiń búgingi urpaǵy retinde óz ustanymdary men usynysyn jetkizýge tyrysty.
Saıys qorytyndysynda Á.Bókeıhan atyndaǵy №76 mektep-gımnazııasynyń «Álıhan muragerleri» toby bas júldeni jeńip alsa, birinshi oryndy Y.Altynsarın atyndaǵy Binom school mektep-lıseıiniń «Alash izbasarlary» toby ıelendi. Ekinshi orynǵa A.Baıtursynuly atyndaǵy Binom school mektep-lıseıi men I.Jansúgirov atyndaǵy №58 mektep-gımnazııasy oqýshylary qol jetkizdi. Úshinshi oryndy №38 mektep-lıseıi, №2 «Daryn» mamandandyrylǵan mektep-lıseıi jáne №8 mektep-lıseıiniń oqýshylary ózara bólisti. Abaı Qunanbaıuly atyndaǵy №87 mektep-gımnazııasynyń oqýshylary «Kórermen kózaıymy» syılyǵyna ıe boldy.
Is-shara sońynda qazylar alqasynyń tóraǵasy, L.N.Gýmılev atyndaǵy Eýrazııa ulttyq ýnıversıtetiniń qazaq ádebıeti kafedrasynyń meńgerýshisi – Qaıyrbek Kemeńger Respýblıka kúni qarsańynda ótip otyrǵan shyǵarmashylyq saıystyń rámizdik máni erekshe ekenin aıtyp, jeńimpazdardy Alǵys hatpen marapattady.
