Sýretterdi túsirgen – Erlan OMAR, «EQ»
Is-sharaǵa qatysýshylar qatarynda ÚEU kóshbasshylary, qoǵamdyq keńesterdiń tóraǵalary, Parlament depýtattary, memlekettik organdardyń, bıznes-qoǵamdastyqtardyń, óńirlik jáne ulttyq damý ınstıtýttarynyń, «Atameken» QR UKP ókilderi, azamattyq belsendiler bar.
Forým jumysyn Mádenıet jáne aqparat mınıstriniń orynbasary Danııar Qadyrov ashyp berdi. Vıse-mınıstr óz sózinde azamattyq qoǵam Qazaqstannyń saıası-áleýmettik jetistikterine zor úles qosyp otyrǵanyn atap ótti.
«Elimizdiń túkpir-túkpirinen kelgen delegattarmen búgin Astana tórinde qaýyshyp otyrǵanymyzǵa qýanyshtymyz. Búgingi forýmnyń tarıhy tereńde jatyr. 2003 jyldan beri azamattyq salanyń belsendiligi óte myqty damyp keledi. Búgingi jıyndy ótkizý merzimi de mańyzǵa ıe. Aldymyzda Respýblıka kúni kele jatyr. Barshańyzdy osynaý aıtýly meırammen shyn júrekten quttyqtaımyn.
Memleket basshysy Qasym-Jomart Toqaev azamattyq qoǵamdy damytýǵa erekshe mán beredi. Elimiz qol jetkizgen jetistikterge azamattyq sala ókilderiniń qosqan úlesi mol. Halyq pen bılik arasyndaǵy altyn kópirdi kúsh-jigerlerińizben, azamattyq ustanymdaryńyzben jalǵastyryp otyrsyzdar. «Halyq únine qulaq asatyn memleket» tujyrymdamasyn iske asyrýdaǵy basty qozǵaýshy kúsh te siz dep aıta alamyz», dedi D.Qadyrov.
Vıse-mınıstr sondaı-aq Prezıdent zań ústemdigine erekshe mán berip otyrǵanyna toqtaldy. Osy oraıda spıker azamattyq qoǵamdy kóptegen ózgeristiń qozǵaýshy kúshi dep atap ótti.
«Árbir zań jobasy aldymen qoǵamdyq talqylaýdan ótedi. Kópshiligińiz – sol zań jobalaryn qaraıtyn jumys toptaryna múshesizder. О́zgerister men usynys jasaısyzdar. Osyndaı eńbektiń arqasynda qabyldanǵan zańdar búkil respýblıka boıynsha kúshine enedi. Sondyqtan bul turǵyda eńbekterińiz úlken. Búgingi forým buǵan deıin óńirlerde uıymdastyryldy. Kópshiligińizben sonda kezdesip, pikir almastyq. Sol is-sharalardyń jańǵyryǵy búgin Astanaǵa jetip otyr. Respýblıka boıynsha ótken forýmdardyń qorytyndysy nátıjesinde usynystar engiziledi. Aıtylǵan pikirlerdiń bári eskeriledi», dedi D.Qadyrov.
Budan keıin Qazaqstan Azamattyq alıansy basshysy Baný Nurǵazıeva sóz aldy. Spıker alǵashqy forým jumysy osydan 20 jyl buryn ótkenine nazar aýdardy. Onyń aıtýynsha, osy ýaqyt aralyǵynda áleýetti azamattyq qoǵam qalyptasqan.
«Qazirgi tańda biz ózgerdik. Basqasha, myqty ári kemel azamattyq qoǵamǵa aınaldyq. Búgin osy zalda belsendi ómir saltyn ustanatyn, qamqor jandar otyr. Elimizdiń damýyna, ár úıdiń bereke-birligine úles qosyp júrgen sizderge shyn júrekten alǵys aıtamyn. Elimizdiń 20 óńirinde ótken aımaqtyq forým – Qazaqstannyń HI Azamattyq forýmynyń basty ereksheligi. Maǵan solardyń bárin kórý baqyty buıyrdy. Árqaısysy laıyqty deńgeıde ótti», dedi B.Nurǵazıeva.
Spıker óz sózinde óńirlik is-sharalarǵa oblys ákimderi túgelge jýyq qatysqanyn atap ótti. Onyń paıymdaýynsha, bul – memleket pen qoǵamnyń birliginiń kórsetkishi. Sondaı-aq B.Nurǵazıeva azamattyq forýmnyń eki jyl saıyn ótetinin jetkizdi. «Jıyn qorytyndysy boıynsha forýmǵa qatysýshylardyń usynystaryn eskere otyryp, elimizde azamattyq qoǵamdy damytý tujyrymdamasyn júzege asyrýdyń Jalpyulttyq jospary qabyldanady», dedi B.Nurǵazıeva.
Azamattyq forým aıasynda halyqaralyq trenerlerdiń qatysýymen sheberlik sabaqtary, áleýmettik jobalardyń kórme-tusaýkeseri, dıalog alańdary, qaıyrymdylyq salasyndaǵy Qurmet ataǵyn, sondaı-aq respýblıkalyq qoǵamdyq syılyqty tabystaý ótedi.
Is-sharanyń maqsaty – Qazaqstannyń strategııalyq maqsaty-ádil memleket qurý úshin qoǵamdy biriktirýde memlekettiń tolyqqandy jáne ózara tıimdi seriktesi retindegi azamattyq sektordyń rólin aıqyndaý.
Aıta keterligi, qoǵam qaıratkerleriniń kúshimen 2023 jyly oblys ákimdikteri men UKP qoldaýymen elimizdiń 20 oblysynda óńirlik forýmdar ótkizildi. Solardyń árqaısysyna alǵash ret óńir basshylary qatysyp, ártúrli taqyryptaǵy ózekti máseleler kóterildi.
Ashylý saltanatynan keıin kezek paneldik sessııalarǵa berildi. Aldymen «Ortalyq Azııadaǵy OD maqsattaryna qol jetkizýdi jedeldetý úshin azamattyq qoǵammen óńirlik áriptestikti qalyptastyrý» taqyrybynda sessııa ótti. Sondaı-aq dóńgelek ústel barysynda «Halyqtyq dıplomatııa – ShYU-ǵa múshe memleketterdiń tıimdi syrtqy saıasatynyń kepili» taqyryby talqylandy.
Paneldik sessııalar «Áıelder. Beıbitshilik. Qaýipsizdik» taqyrybynda jalǵasty. Kúni boıy ótken forýmnyń ekinshi bóliginde «Azamattyq qoǵam ınstıtýttary: Ádiletti Qazaqstan qurý jolyndaǵy shoǵyrlandyrý» taqyrybynda pikirtalas uıymdastyryldy. Sonymen qatar «Qoǵamdyq keńester ınstıtýtyn damytý» jáne «Ornyqty damý maqsattaryna qol jetkizý barysyndaǵy óńirlik aspekt» taqyrybynda paneldik sessııalar ótti.
Jalpy, qazirgi tańda elimizde 258 qoǵamdyq keńes jumys isteıdi. Sonyń ishinde respýblıkalyq deńgeıde – 35, jergilikti deńgeıde – 223 (oblystar, Astana, Almaty, Shymkent qalalary deńgeıinde – 20, qalalar, aýdandar deńgeıinde 203 keńes bar.
Barlyq deńgeıdegi qoǵamdyq keńesterdiń quramyna 3 830 el azamaty kiredi. Onyń ishinde jergilikti ókildi organdar janyndaǵy keńesterge – 3 251, ortalyq memlekettik organdar janyndaǵy keńesterge – 456, kvazımemlekettik sektor sýbektileri janyndaǵy keńesterge – 123 adam múshe.
Sondaı-aq forým aıasynda «Azamattyq bastama aımaǵy» áleýmettik jobalar kórmesi ótti. Onda ÚEU qyzmetiniń baǵyttary boıynsha neǵurlym tabysty iske asyrylǵan áleýmettik mańyzy bar jobalar kórsetildi.
Forým qorytyndysy boıynsha elimizde azamattyq qoǵamdy damytýdyń 2030 jylǵa deıingi tujyrymdamasyna ózgerister men tolyqtyrýlar engizilmek.
