Eskertkishtiń ashylý saltanatyna jáne № 6 mamandandyrylǵan órt sóndirý bólimine Asqar Zabıkýlınniń esimi berilý is-sharasyna Tótenshe jaǵdaılar mınıstri Syrym Sháriphanov, elorda ákimi Jeńis Qasymbek, garnızon basshylyǵy men jeke quramy, azamattyq qorǵaý organdarynyń ardagerleri, Asqardyń týystary men jaqyndary qatysty.
«Árbir adamnyń ómiri baǵa jetpes qundy, memlekettiń strategııasy, eń aldymen, azamattardy qorǵaýǵa, tótenshe jaǵdaılardyń aldyn alýǵa jáne joıýǵa baǵyttalǵan. Sol sebepti qutqarýshylar men órt sóndirýshilerdiń eńbegi asa mańyzdy. Bul eskertkish – Asqardyń ójettigi, janqııarlyǵy men adaldyǵynyń belgisi. Búgin bizdiń kóńilimiz túsip, qaıǵyryp, bárimiz úshin úlgi bolatyn erlikke degen sheksiz qurmetke kýá bolyp turmyz. Onyń jasaǵan erligi – azamattarymyzdyń qaýipsizdigi jolyndaǵy kúreste bizge kúsh pen qýat beretin úlgi», dedi S.Sháriphanov.
Resmı is-sharadan keıin eskertkishtiń ashylýyna jınalǵandar memorıalǵa gúl shoqtaryn qoıyp, erlikpen qaza tapqan búginginiń batyryn bir mınýt únsizdikpen eske aldy. Bıiktigi 3 metr bolatyn eskertkishte Asqardyń bıýsti qoladan, al tómengi bóligi mármárdan jasalǵan.
Elordalyq órt sóndirýshi Asqar Zabıkýlın 2022 jyldyń 20 qarashasynda turǵyn úı keshenindegi órtti sóndirý kezinde qaza taýyp, úsh adamnyń ómirin aman saqtap qalǵan edi. Prezıdenttiń Jarlyǵymen Asqar Zabıkýlın qaıtys bolǵannan keıin I dárejeli «Aıbyn» memlekettik nagradasymen marapattaldy.
