Sertine adal Áskerbek

Álemde tehnogendik apattar kóbeıgen saıyn tótenshe jaǵdaı qyzmetkerleriniń de qadiri artyp barady. Ala jazdaı dalada jıi tutanatyn alapat órt, sýǵa túsý kezindegi jazataıym oqıǵalar, qystyń úskirik aıazynda jolda qalatyn jolaýshylardy qossańyz, elimizde tótenshe jaǵdaı qyzmetkerlerine túsken salmaqtyń qanshalyqty aýyr ekenin kóresiz.

Adam ómirin qutqarý mınýtpen emes, sekýndpen ólshengen sátterde qutqarýshynyń epti­li­gi, shıraqtyǵy, jaǵdaıdy tez tarazylaı bilýi, sporttyq da­ıyn­dyǵy, shydamdylyǵy synǵa túsedi. Tótenshe jaǵdaı kezinde qut­qarýshynyń qyzmetine adal­dyǵy men jeke basynyń qasıet­teri bir-birimen astasyp jatady. Azamattyq qorǵaý qyz­me­ti­niń starshınasy Áskerbek Qulbaraqov – osyndaı jigit­ter­diń biri. Onyń tótenshe jaǵ­daı qyzmetindegi eńbek ótili – 17 jyl. Áskerden keıin eńbek jolyn órt sóndirýshi bolyp bastap, sodan beri qanshama qıyn­dyq sát­terge tap kelse de, óz maman­dyǵynan bas tartqan emes.

Aqtóbede órt kezinde óz basyn qaterge tigip, birneshe adamdy alyp shyqqan qutqarýshynyń erligin aqtóbelikter jaqsy biledi. 2011 jyly Aqtóbe qalasynyń Ábilqaıyr kóshesi boıyndaǵy 9 qabatty turǵyn úıde órt tutanyp, odan úıdiń plastıkpen qorshalǵan qabyr­ǵa­lary janǵan kezde Áskerbek jedelsatymen kóterilip, birden 9 adamdy alyp shyqty. 2021 jyly qaladaǵy kóppáterli úı­den shyqqan taǵy bir órt kezinde ol alty bala men bir qart kisini alyp shyqty.

Áskerbek 2011 jyly «Tó­ten­she jaǵdaıdaǵy erligi úshin» medalimen, 2020 jyly «Erligi úshin» medalimen marapattaldy. «Úzdik qorǵaýshy» ataǵyn da ıelendi. Otbasynda úlgili áke. Onyń eńbek joly – bala­lary men týystaryna úlgi. Qoly bos kezinde sportpen aınalysady. Sonyń ishin­de qysqy sport túrlerin una­ta­dy. Áskerbek ózi bas bolyp shaı­baly hokkeı komandasyn uıymdastyryp, oǵan jas jet­kin­shekterdi tartyp ónege kórse­tip júr. Beıbit kúnniń batyry Áskerbek – mine, osyndaı azamat.

Aqtóbe oblysy