KTK telearnasynyń málimetinshe, kópshiliktiń nazaryn aýdarǵan mıllıondar memlekettik satyp alý saıtyna shyqqan. Onda baıqaýǵa qatysýǵa ótinish 2 qarashaǵa deıin jalǵasatyny kórsetilgen.
Ákimdiktegilerdiń sózinshe, Esil aýdany elordanyń sol jaǵalaýdaǵy kórnekti oryndardy qamtıtyn bolǵandyqtan, osynshama qyrýar qarajattyń qarastyrylýy zańdylyq. Basqa óńirlerden keletin qonaqtar men týrıster de óte kóp. Kúndelikti qoǵamdyq, mádenı oryndar, alańdar men saıabaqtarda elorda turǵyndary bos ýaqyttaryn ótkizedi. Satyp alý saıtyndaǵy tapsyrys aldaǵy merekelerge, ıaǵnı Respýblıka, Táýelsizdik kúni men jańa jyldaǵy bezendirýge jumsalady dep otyr. Sonymen qatar Esil aýdany ákimdiginiń jaýabynda mereke kúnderi sol jaǵalaýdyń basty kósheleri men kópirleri jalaýlarmen sándeledi delingen.
“Esil aýdanynda shet memleketterdiń resmı delegasııalarynyń qatysýymen halyqaralyq issharalar ótkizilip jatqanyn eskere otyryp, osy memleketterdiń týlary men baǵdardy tıisti túrde jobalaý, shaǵyn arhıtektýralyq pishinderdi, podıýmdardy, sahnalardy shyǵarý, ornatý jáne demontajdaý, kópshilik is-sharalar, sonyń ishinde konsertter, ashyq aspan astyndaǵy, kórme, jármeńke ótkizý úshin kıiz úıler beriledi”, –delingen Esil aýdany ákimdiginiń habarlamasynda.
