Foto: Turizm_zhane_sport_ministrligi
Sport túrleri boıynsha federasııa basshylary men bas bapkerler qatysqan jıynda Memleket basshysynyń tapsyrmasyna saı atqarylýy tıis jumystyń jaıy pysyqtaldy.
Eń aldymen grek-rım, erkin jáne áıelder kúresi federasııasynyń ókilderi esep berdi. Sport fýnksıonerleri palýandardyń kórsetken óneri týraly, sondaı-aq oryn alǵan jaǵdaıdy baıandady. Esep berý jıynyna grek-rım kúresinen bas jattyqtyrýshy Iýrıı Melnıchenko qatyspady. Týrızm jáne sport mınıstri federasııa basshylyǵyna osy másele boıynsha eskertý jasap, sportshylarymyzdyń kóńil kónshitpegenin atap ótti.
«Palýandar birinshi kezeńde táýir-aq kúresedi, al ekinshi kezeńde demigip qalady. Jeke daıyndyq baǵdarlamasy joq. 2024 jylǵy Parıj olımpıadasynda medalǵa iligedi degen sportshylardyń tizimin quryp, olardyń jattyǵýyna tolyqqandy jaǵdaı jasaý qajet», dedi E.Marjyqpaev.
Sý dobynan da erler men áıelder quramasy jazǵy Azııa oıyndarynan qola júldeni mise tutty. Quramanyń bas bapkeri Damır Temirhanov oıynshylar arasynda býyn almasý júrgenin, jasy kelgen sportshylardyń ornyn jastar basqandyqtan komandalyq oınaý júıesinde aǵattyq ketkenin jasyrmady.
