Saltanatty is-shara barysynda Qazaqstan Respýblıkasynyń shalǵaı aımaqtaryndaǵy halyqty onkologııalyq skrınıngtik jáne profılaktıkalyq tekserýdi der kezinde júzege asyrýǵa baǵyttalǵan «QH Densaýlyq joly» qaıyrymdylyq jobasynyń tusaýkeseri ótti. Joba aıasynda óńirdiń úsh oblystyq onkologııalyq ortalyqtaryna jyljymaly medısınalyq keshender satyp alýy josparlanyp otyr.
Medısınalyq qural-jabdyqtarmen qamtylǵan 2 kólikten turatyn jyljymaly medısınalyq keshen Almaty oblystyq kópsalaly emhanasyna saltanatty túrde berildi.
«OPTIMA» jyljymaly medısınalyq kesheni tomosıntez fýnksııasy bar sandyq mammografııalyq jabdyqpen, sarapshylyq deńgeıdegi ýltradybystyq júıemen jáne joǵary deńgeıde zertteıtin kompıýterlik tomografpen jabdyqtalǵan. Keshenniń quny 1,091 mln teńgeni quraıdy. Bul medısınalyq keshen eki kólikten turady, onyń bireýi 128 kesindilik kompıýterlik tomografpen, ekinshisi sıfrlyq mammografııalyq apparatpen jáne ÝDZ apparatymen jabdyqtalǵan. Eki qural da Japonııada jasalǵan. Kólikter qaterli isik skrınıngine arnalǵan. Mundaı klastaǵy jáne konfıgýrasııadaǵy medısınalyq jabdyq Qazaqstanda alǵash qoldanysqa berilip otyr.
Sharaǵa Almaty oblysynyń ákimi Marat Sultanǵazıev, «Qazaqstan halqyna» qoǵamdyq qorynyń basshysy Bolat Jámishev jáne Qazaq onkologııa jáne radıologııa ǵylymı-zertteý ınstıtýtynyń dırektory, elimizdiń bas shtattan tys onkologi Dılıara Qaıdarova qatysty.
«Búginde elde shalǵaı aýyldardyń turǵyndaryn onkologııalyq skrınıngtik tekserýlermen qamtý deńgeıi tómen. Mobıldi medısınalyq keshender, ásirese qaterli isikke shaldyǵýy múmkin naýqastarǵa joǵary tehnologııalyq konsýltatıvtik-dıagnostıkalyq kómekke qoljetimdilikti arttyryp, tómen dozaly kompıýterlik tomografııany qoldaný arqyly skrınıngtik tekserýlerdi ýaqtyly ótkizýge yqpal etedi», dedi «Qazaqstan halqyna» QQ tóraǵasy Bolat Jámishev.
«QH Densaýlyq joly» jobasyn Qazaqstan Respýblıkasynyń qanatqaqty aımaqtary – Almaty, Qyzylorda jáne Aqtóbe oblystarynda iske asyrý arqyly halyqty qamtý kólemin jáne naýqastarda, ásirese erte (0–1 kezeńderinde) onkologııalyq aýrýlardy anyqtaýdy arttyrady degen úmit bar. Jobany júzege asyrý arqyly halyqty onkologııalyq skrınıngpen qamtýdy qanatqaqty aımaqtarda 50-den 70 paıyzǵa deıin artpaq.
«Almaty oblysy – halyq sany men aýdany boıynsha Qazaqstannyń iri óńirleriniń biri. Oblysta 1,5 mıllıonnan astam adam turady, onyń 1,3 mıllıonnan astamy – aýyl turǵyndary. Joǵary tehnologııalyq jabdyqtarmen jabdyqtalǵan eki jyljymaly medısınalyq keshendi alý oblystyń shalǵaı jáne jetýi qıyn aýdandarynda halyqty ýaqtyly qoljetimdi jáne bilikti medısınalyq kómekpen qamtamasyz etýge úles qosatyny sózsiz», degen óńir basshysy Marat Sultanǵazıev jyljymaly medısınalyq keshenniń halyq densaýlyǵyn jaqsartýǵa septigi tıerine senim artty.
Aıta keterligi, bir ǵana Almaty oblysynda 10617 onkologııalyq naýqas dıspanserlik esepte tur. Bıylǵy jyldyń 8 aıynda taǵy 1342 naýqas tirkelgen.
Jobany «Qazaqstan halqyna» qoǵamdyq qory Qazaq onkologııa jáne radıologııa ǵylymı-zertteý ınstıtýtymen, qanatqaqty oblys ákimdikterimen jáne oblystyq onkologııalyq ortalyqtarmen seriktestikte júzege asyrady.
Kelesi aptadan bastap jyljymaly medısınalyq keshender osy oblystyń shalǵaıdaǵy Kegen, Raıymbek, Uıǵyr aýdandaryna jol tartady.
Almaty oblysy
