Kóshpeli keńeske Qazaqstannyń Eńbek Eri, Májilis depýtaty, respýblıkalyq Ardagerler uıymynyń tóraǵasy Baqtyqoja Izmuhambetov bastaǵan Ortalyq keńestiń tóralqa músheleri, oblys ákimi Qumar Aqsaqalov, Astana, Almaty, Shymkent qalalary men óńirlik fılıaldardyń basshylary qatysty.
Baqtyqoja Salahatdınuly aldymen jınalǵandardy Respýblıka kúnimen quttyqtap, ardager áriptesterine joǵary memlekettik nagradalar tapsyrdy.
«Prezıdentimiz ádil ári ozyq memleket qurýdy kózdeıdi. El ómirinde bolyp jatqan oń ózgerister de az emes. «Halyq únine qulaq asatyn memleket» tujyrymdamasy sátti júzege asyp keledi. Bizdiń basty mindetimiz – Prezıdent reformalaryn júzege asyrý baǵytyndaǵy jumystarǵa belsene atsalysý, elimizde bolyp jatqan túbegeıli betburystardy óńir turǵyndaryna barynsha baıypty, túsinikti jetkizý. Búgingi basqosýymyz ádiletti memleketti qurý jolyndaǵy kósheli isti qoldaıtyn, aldaǵy josparymyzdy aıqyndaıtyn asa mańyzdy keńes», dedi Baqtyqoja Izmuhambetov.
Budan ári jergilikti ardagerler uıymdarynyń aldaǵy jumys josparynyń basym baǵyttary jóninde áńgime órbip, keleshekte Joldaýda aıtylǵan birneshe másele basty nazarǵa alynatyn boldy.
Uıym tóraǵasynyń aıtýynsha, ardagerler ádiletti qoǵam qurý jolyndaǵy ortaq iske atsalysyp, memlekettiń ishki máselelerine belsendi túrde qoldaý kórsetip otyrýǵa tıis. Osy maqsatta Prezıdent bastamalaryn jurtshylyqqa túsinikti jetkizip, kópshilik kókeıine sińire alatyn, jalpy álemdegi ahýaldan habary mol, elge bedeldi, aıtary bar ardagerlerden turatyn mobıldi toptar qurylmaq.
Atalǵan uıymnyń jumys josparyn pysyqtaý barysynda ulttyq dástúrdi, mádenı-rýhanı qundylyqtardy dáripteıtin is-sharalarǵa kóbirek atsalysý, jastardyń boıyna otansúıgishtik qasıetterdi uıalatatyn rýhanı dúnıelerdi kóptep nasıhattaý sekildi mańyzdy máseleler sóz boldy.
«Bul máselede bizge Qyzylorda, Jambyl, Túrkistan, Almaty oblystary jaqsy úlgi bola alady. Atalǵan óńirlerde «Ákeler mektebi», «Analar mektebi» sııaqty qoǵamdyq ınstıtýttar jumys júrgizip jatqanyn bilemiz. Osyndaı qoǵamǵa tıetin paıdasy zor ıgi jumystardy ózge óńirler de qolǵa alýy kerek. Sonymen qatar keıingi jyldary din tóńireginde de neshe túrli ushqary oı-pikirler jıi aıtylyp júr. О́kinishke qaraı, túrli aǵym ókilderi din jaıynda áńgime aıtamyz dep, qazaqtyń salt-dástúrin ysyryp, óziniń teris ıdeologııasyn tyqpalaǵysy keledi. Din men dástúrdi eshýaqytta bir-birine qarsy qoıýǵa bolmaıdy. Halqymyz dástúrdi erekshe qadirlegen, qasterlegen, saqtaı bilgen. Jalpy, din taqyryby óte názik dúnıe ekenin eskerip, osy máselege muqııat bolýlaryńyzdy suraımyn», dedi Baqtyqoja Izmuhambetov.
Jıyn sońynda ardagerler el irgesiniń beriktigine úles qosý, Memleket basshysynyń reformalaryn júzege asyrýǵa belsendi atsalysý týraly ortaq baılamǵa keldi.
Qostanaı oblysy
