Foto: Úkimettiń baspasóz qyzmeti
Álıhan Smaıylov eń aldymen Úkimet atynan jáne jeke óziniń atynan qaza tapqandardyń týystary men jaqyndaryna qaıǵyra kóńil aıtty.
Budan keıin Mınıstrler kabınetiniń músheleri marqum bolǵan kenshilerdi bir mınýt únsizdikpen eske aldy.
«Barlyq zardap shekkenderge tezirek saýyǵyp ketýin tileımin. Densaýlyq saqtaý mınıstrligi emdelip jatqan árbir kenshiniń jaǵdaıyn baqylaýda ustasyn. Qaza tapqandardyń otbasylaryna qajetti kómek kórsetilip jatyr. Memleket basshysy tıisti tapsyrmalar berdi», dedi Premer-mınıstr.
Tótenshe jaǵdaılar mınıstri Syrym Sháriphanov málim etkendeı, 28 qazanǵa qaraǵan túni Kostenko shahtasynda 700 metr tereńdikte órt shyǵyp, odan keıin metan-aýa qospasy jarylǵan. Oqıǵa ornyna dereý Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Qaraǵandy fılıalynyń kúshteri jumyldyryldy.
Apat kezinde aýysymda 252 kenshi bolǵan, onyń 5-eýin qutqarý qyzmetiniń kúshterimen tabylyp, jer betine shyǵaryldy, 200-den astam adam óz betinshe kóterildi. Izdestirý-qutqarý jumystary kezinde 45 kenshiniń máıiti jáne aldyn ala boljam boıynsha 46-shy qaza tapqan adamnyń dene bólshekteri tabyldy.
Izdeý jumystary elektr qýatynyń bolmaýy, taý-ken qazbalarynyń uzyndyǵy jáne kóptegen buzylǵan mehanızmderdiń bolýy saldarynan qıyndaǵany aıtyldy. Jekelegen sý basqan qazba oryndaryna qol jetkizý qıyn bolǵan.
Qazirgi tańda ashyq órt oshaqtary joq, gaz jaǵdaıy qalypty. Shahta qyzmetin qalpyna keltirý úshin taý-ken qazbalaryn zertteý jáne jekelegen ýchaskelerde sý sorý jumystary júrgizilip jatyr.
Apat sebepterin tekserý sheńberinde Úkimettik komıssııa músheleri shahtaǵa tústi. Nátıjesinde óte mańyzdy buzylýlar anyqtaldy: taý-ken qazbalarynda shahta jabdyqtary jyljyp ketken, 15-ten astam oqshaýlaǵysh bógetter men jeldetý qondyrǵylary qıraǵan. Tergeýge Qazaqstannan, jaqyn jáne alys shetelderdiń saraptamalyq uıymdary tartyldy.
О́z kezeginde Qaraǵandy oblysynyń ákimi Ermaǵanbet Bólekpaev baıandama jasady.
Álıhan Smaıylov Memleket basshysy Kostenko shahtasynda kenshilerdiń qaza bolýyna baılanysty tergeý jumystaryn júrgizip, «ArselorMıttal Temirtaý» kompanııasymen ınvestısııalyq yntymaqtastyqty toqtatýdy tapsyrǵanyn atap ótti.
«Bıyl tamyz aıynda da «ArselorMıttal Temirtaýda» osyndaı apat oryn alǵan bolatyn. Ol kezde 5 shahter qaza tapty. Kóptegen adam ólimine ákep soqqan apat óndiristegi qaýipsizdik talaptarynyń saqtalmaýymen tikeleı baılanysty. Bul – birinshi kezekte, kásiporyn basshylyǵynyń kinási», dedi ol.
Premer-mınıstr olar kompanııa jumysynan ózderin shettetip tastaǵanyn, mundaı áreketsizdiktiń saldary birneshe jyldar boıy qaıǵyly jaǵdaılarǵa ákep soqtyryp kele jatqanyn aıtty.
«Kompanııa óz mindettemelerin oryndaǵan joq. Qazirgi tańda, «ArselorMıttal Temirtaýda» kompanııasyn Qazaqstannyń paıdasyna berý rásimderi aıaqtalý satysynda», dedi Úkimet basshysy.
Onyń aıtýynsha, arnaıy Komıssııa apattyń sebepterin jan-jaqty tekserip, oǵan kináli adamdardy anyqtaý jumystaryn jalǵastyrady.
«Qaraǵandy oblysynyń ákimdigi men Tótenshe jaǵdaılar mınıstrligi apatty joıý jóninde sharalar qabyldaýy tıis. Eń bastysy – qaza tapqandardyń otbasylaryna barlyq kómekti kórsetip, zardap shekkenderdiń densaýlyqtaryn qalpyna keltirý. Osyndaı qıyn jaǵdaıda eshkim de nazardan tys qalmaıdy», dep qorytyndylady sózin Álıhan Smaıylov.
