Federasııa ókilderi málim etkendeı, Bolat Aqsholaqovtyń daýys berýdegi jeńisi Qazaqstan úshin de, IýNESKO-nyń álemdik klýbtyq qozǵalysy úshin de tarıhı sát boldy. Otyrys barysynda kongreske qatysýshy elder halyqaralyq uıymnyń bastamalary men jobalaryn iske asyrýdaǵy elimizdiń biregeı tájirıbesin erekshe atap ótti, sondaı-aq jańa basshynyń kelýimen dúnıejúzilik federasııanyń odan ári tabysty damýyna úmit artty.
«Nátıjesinde, Qazaqstandy saılaý týraly sheshimdi Kongrestiń kóptegen qatysýshy elderiniń ókilderi qoldady, bul bizdiń Respýblıkamyzǵa degen senimniń joǵary deńgeıin jáne halyqaralyq arenadaǵy aıtarlyqtaı róli bar ekenin rastaıdy. Bul nátıjege qol jetkizý barysynda Qazaqstan Respýblıkasynyń Syrtqy ister mınıstrligi men Qazaqstan Respýblıkasynyń IýNESKO jáne ISESKO isteri jónindegi Ulttyq komıssııasynyń turaqty qoldaýy mańyzdy ról atqardy», delingen federasııa habarlamasynda.
Aıta ketý kerek, IýNESKO klýbtarynyń qozǵalysy 1947 jyly Japonııada IýNESKO-nyń negizgi basymdyqtary men qundylyqtaryn azamattyq qoǵam arasynda keńinen nasıhattaý maqsatynda bastaý alǵan. Búgingi tańda bul qozǵalys álemniń 90-ǵa jýyq elinde keńinen taralyp, 5000-ǵa jýyq uıymdy qamtıdy.
«Qazaqstandyq federasııa úshin jastar árqashan basymdyqqa ıe boldy. Osyǵan baılanysty, biz barlyq jınaqtalǵan tájirıbeni engizýdi jáne búkil álem boıynsha IýNESKO Klýbtyq qozǵalysynyń bolashaq kóshbasshylaryn daıarlaý úshin berik negiz qalaýdy usynamyz», dep atap ótti Bolat Aqsholaqov.
Budan buryn Bolat Aqsholaqovtyń basshylyǵymen Qazaqstandyq Ulttyq IýNESKO klýbtary Federasııasy aıtarlyqtaı nátıjelerge qol jetkizdi. Búgingi tańda federasııa 190 klýbty 17 000-nan astam belsendi múshesin biriktire otyryp, 45-ten astam eldiń qatysýymen 550-ge jýyq is-sharany sátti uıymdastyrdy. Sonymen qatar 75 000-ǵa jýyq qatysýshyny qamtyǵan biregeı halyqaralyq joba – «The Planet of ART( jastar festıvali iske qosyldy.
Dúnıejúzilik federasııanyń prezıdenti bolyp saılanǵannan keıin, IýNESKO-nyń Jer sharynyń barlyq aımaqtaryndaǵy qaýymdastyqtary men klýbtaryn nyǵaıtý jáne damytý, olardyń tanymaldyǵy men jergilikti qaýymdastyqtardaǵy rólin arttyrý, jańa qaýymdastyqtar men klýbtardyń sanyn keńeıtý qajettiligi basym mindetter retinde aıqyndaldy. Dúnıejúzilik Federasııanyń negizgi baǵdarlamalaryn birlesip júzege asyrý úshin IýNESKO jáne múshe memleketterdiń úkimetterimen yntymaqtastyqty tereńdetýge degen umtylys bildirildi.
