Foto: Turizm_jane_sport_ministrligi
Qytaıdyń Hanchjoý qalasynda ótken jazǵy Azııa oıyndaryndaǵy kórsetkishke baılanysty eskek esý, jeńil atletıka jáne sadaq atý federasııalarynyń basshylary esep berdi.
Azııa qurlyǵynyń tórt jyldyq alamanynda akademııalyq eskek esýden sportshylarymyzǵa medal buıyrǵan joq. Biraq baıdarka men kanoede eskek esý saıysynda 1 altyn, 4 kúmis, 3 qola júlde enshimizge tıdi.
Týrızm jáne sport mınıstri akademııalyq eskek esý boıynsha ulttyq quramanyń Azıadadaǵy nátıjesi kóńil kónshitpeıtinin aıtty. Eskek esýshilerdi Azııa oıyndaryna attandyrǵanda zor senim artylyp, altyn medal oljalaıdy degen úmit te basym boldy. Qytaıdaǵy alamandy arnaıy baryp tamashalaǵan mınıstr E.Marjyqpaev quramaniń ishki tártibine baǵynǵysy kelmeıtinderdi tezge salý jóninde eskertip, sportshylardyń fýnksıonaldyq hám dene daıarlyǵy da mardymsyz ekenin aıtty. Jeńil atletıka federasııasynyń basshylyǵy da maqtaý estigen joq. Hanchjoýdaǵy jazǵy Azııa oıyndarynan atletter 4 qola medaldi mise tutyp, jalpykomandalyq esepte 16-orynǵa ornyqty. 2018 jyly Indonezııa eli ótkizgen jazǵy Azııa oıyndarynda jeńil atletter komandalyq esepte 8-satyǵa turaqtaǵan edi.
«Parıjdegi tórt jyldyqtyń basty dodasyna nebári 8 aı qaldy. Qazir bizge naqty jospar men yntymaqtastyqta jumys isteý qajet. Federasııalarǵa ulttyq quramanyń rezervin qalyptastyrý jóninde jumysty kúsheıtýdi tapsyramyn. Bas jattyqtyrýshylarmen birlesip Parıj Olımpıadasyna deıin komanda kóshbasshylaryn jeke daıarlaýdyń josparyn daıyndaý kerek», dedi mınıstr.
Sadaq atý federasııasy basshysynyń da baıandamasyndaǵy aıtylǵan málimet máz emes. Tipti birde-bir baǵdarlamada medal buıyrmady. Kúıingen E.Marjyqpaev sadaq atýshylardyń jumysyna qanaǵattanbaıtynyn aıtty. Mınıstr qyr astynda turǵan Parıj jazǵy Olımpıadasyna tyńǵylyqty daıarlyq túzý úshin, jekelegen sportshylardy sharbolattaı shyńdaýda otandyq mamandardyń biliktiligi kótermese, syrttan bapker shaqyrý qajettigin de eskertti.
