Shubat ishemiz dep aıaldaıtyn qonaqtarda damyl joq. Biri kelip, biri ketip jatyr. Densaýlyqqa paıdasyn bilgen soń-daǵy suranys kóp shyǵar. Áıteýir, otbasylyq kásiptiń basy-qasynda júrgen Áımen Aıdarhanqyzy kelimdi-ketimdi meımandarǵa kesesin ala júgirip, qonaqjaılyq tanytady. Keıbireý em úshin dep júıeli túrde kelip ishedi. Qutyǵa quıyp, satyp alyp ketip jatqany qanshama!
Paıdasy qymyzdan esh kem emes shubat táýlik ishinde babyna keledi. Sodan soń ǵana sapyryp, kópirshitip baryp isher edińiz. Dámi til úıiredi.
– Shubatqa ǵana emes, túıeniń etine de suranys bar. Balanyń býyny qatpaı jatsa, aıaq-qol qaqsasa, eti taptyrmas em eken. Qylaıaǵy, túıe soıǵanda aıaǵyna deıin surap keletinder bar, – deıdi Áımen Aıdarhanqyzy oıýly kesege shubat quıyp jatyp.
Saýyn ýaqyty taıap qalsa kerek, oqtyn-oqtyn kıiz úıdiń esigine moıyn soza qarap qoıady. Bir ýaqytta adam boıy bitik ósken shıdiń arasynan jeldirtip kele jatqan túıeler kóringen. Bota-taılaǵyn qosqanda, qyryq shaqtysyn baǵyp otyr eken. Qoıǵa qaraǵanda áýresi az deıdi. Botalaıtyn ýaqytta ǵana kún-túni kúzetip, kútimin jasaıdy. Áıtpese, kóbinese jaıylymda júredi. Qys maýsymyna dep jońyshqasyn túsirip, botalaryna jem ázirleıdi.
– Túıe saýýǵa ábden mashyqtanyp aldyq. Bári jýas. Osy mańaıda jaıylyp júre beredi. Saýyn kezi aıdap alyp kelemiz. Túnge qaraı qamaımyz. О́zimiz kúnniń jyly kezinde kıiz úıde qonyp jata beretinbiz. Qazir aýylǵa baryp, tańerteń erte qaıta kelemiz, – deıdi sharýashylyq jetekshisi Manarbek Qurmetuly.
Mań-mań basqan oısylqara tuqymy mańaıyna mańǵazdana qaraı kelip, keń qorshaýdyń kireberisindegi úırenshikti oryndaryna toqtady. Áımen men Manarbek qos búıirlerine tura qalysyp, birneshe túıeni lezde saýyp ala qoıdy. Qazir tórt ýaqyt saýsa, qystyń kúni eki-aq ret saýady. Ras, áketip bara jatqandaı áýresi joq sııaqty. Tipti saýyn kezinde kózderi jáýdiregen botasyn da baılamaıdy eken. О́z betterimen enesine erkelep tura beredi.
Zaısannyń irgesinde kásipterin dóńgeletip, halyqtyń suranysyn aqtap, eńbekpen bite qaınasyp otyrǵan bul otbasy Qytaıdyń Jemeneı aýdanynan kóship kelgen. Bir jaǵynan túıe baǵýdy bala kúnderinen kórip óskendikten shyǵar, kútip-baptaýdyń ebi men esebin biledi. Áýelde sıyr asyraýdy jón kórip, memlekettiń 2 mln teńge tıimdi nesıesin alypty. Alaıda, basqa maldan góri túıeniń paıdasy kól-kósir degen baılamǵa kelgen. Soısa et, minse, kólik. «Qýyrdaqtyń kókesin túıe soıǵanda kóresiń» degendeı, et te mol túsedi. Aldyna tastaıtyn jem-shóbi sıyr men jylqydan artyq emes shyǵar. Kórgenimizdeı, Manarbek pen Áımen atakásipti myqtap qolǵa alǵan, jolǵa qoıǵan. Sonyń arqasynda bala-shaǵasyn asyrap otyr.
Aıtýlaryna qarasaq, atakásip erteńgi kúni týrısterdiń de nazaryn aýdarady. Onyń ústine, Shubat aýyly Omby – Maıqapshaǵaı kúre jolynyń boıynda tur. Sońǵy kezderi saıahat quryp, elimizge aǵylyp júrgen qytaı azamattary shekaradan óte salǵan bette aldarynan qazaqtyń aqshańqan kıiz úıi kezdesip, shubat usynsa, qonaqjaılyǵymyzdy kórsetkenimiz emes pe! Eń bastysy, ár toqtaǵan týrıst tabys ákeledi. Sóıtip, Zaısannyń týrıstik ekonomıkalyq áleýeti de arta túser me edi?
Shyǵys Qazaqstan oblysy,
Zaısan aýdany
