Qundy jádigerler mýzeıi

Al 31 mamyr – Saıası qýǵyn-súr­gi­n jáne ashtyq qurbandaryn eske alý kúni aýqymdy kon­ferensııalar uıym­das­ty­rylady. Sony­men birge repressııa qurbany bol­ǵan, stalındik júıeniń ezgisin kórgen jan­dardyń urpaqtary mýzeıge jıi bas suǵa­dy. Shymkentti kórýge kelgen týrıs­ter de mýzeıdi tamashalaıdy. Olardy kó­bine jergilikti jerdiń turmysy, tarıhy­ qy­zyq­tyrady. Budan bólek, mýzeıge eli­miz­diń zııaly qaýym ókilderi, mádenıet qaı­ratkerleri kelip, tarı­hı qujattar, derektermen tanysqandy jón kóredi.

Jýyrda mýzeıge bir top zııaly qaýym ókili keldi. Olardyń arasynda Júsipbek Aımaýyt­ulynyń týǵan inisi Jaqypbektiń neme­resi, medısına ǵylymdarynyń do­k­tory Baýyrjan Ysqaqov, tarıh ǵylym­­darynyń doktory, professor Jam­byl­­ Artyqbaev, Jazýshylar odaǵy tór­aǵa­­sy­nyń birinshi orynbasary Nurjan Qýan­­taı­uly, Qazaq­stannyń eńbek sińirgen qaı­­­rat­keri Kenjehan Matyjanuly, fılo­­­lo­gııa ǵylymdarynyń kandıdaty Aıman Zeı­nýl­lına, qalamger Saılaý Baı­bosynov bar.

Qonaqtar mýzeıdiń jańǵyrtylǵan jańa ekspozısııa zaldarymen tanysyp, qazaq halqynyń zulmat jyldary ja­ıynda tarıhı-tanymdyq baıandamalaryn tyńdady. Budan bólek, el zııalylary «Taǵzym» zalynda saıası qýǵyn-súrginge ushyraǵan azamattardyń rýhyna quran baǵyshtap, taǵzym etti. Keıin mýzeı ekspozısııasyna qatysty usynystaryn bildirip, ózara pikir almasty. О́z kezeginde mýzeı atynan qonaqtarǵa erekshe qurmet kórsetilip, 10 tomdyq «Aq jol» kitaby syıǵa tartyldy. Ekskýrsııa sońynda qonaqtar mýzeıdiń qyzmetin joǵary baǵalap, Pikir kitabyna jyly lebizi men estelik jazba qaldyrdy.

«Shymkenttegi О́.Jánibekov atyndaǵy peda­gogıkalyq ýnıversıtette Júsip­bek Aımaýytulyna atynda eskertkish ashy­­­­lyp, taqtaısha qoıyldy. Alash qaı­rat­­keriniń urpaǵy osy is-sharaǵa qonaq bo­lyp qatysyp, bir jaǵynan bizdiń mýzeı­ge ta­rıhı qujattardyń kóshirmesin tapsyr­dy. Alash kósemderiniń urpaqtary mýzeı­men tyǵyz baılanysta. Máselen, Sultan­bek Qojanovtyń ini­siniń balasy­ kóne fotoalbomdy syıǵa tar­­typ ket­ti.­ Ol Kentaý qalasynan S.Qoja­nov atyn­­daǵy kósheniń ashylýy­na­ kúsh sal­ǵan. Alash zııalysynyń atynan týǵan jeri­nen mýzeı de ashqan. Aldaǵy ýa­qytta Sul­tan­bek Qojanovtyń 130 jyl­dyǵyn toı­laýǵa ázirlikte júr. Jalpy, saıası qý­ǵyn-súrgin qurbandarynyń urpaq­ta­ry­men tyǵyz qarym-qatynastamyz. Tipti Whatsapp jelisinde ortaq chatymyz da bar. Bıyldan bastap vıdeotekany qolǵa al­dyq. Bul jerde repressııa qurban­da­ry­ ur­paq­tarynyń esteligin jazyp alamyz. Keıin redaksııalap, jınaqqa engizemiz. Ási­rese mýzeıdiń jumy­syna sheteldikter qat­ty qyzyǵady. Jaqynda ǵana AQSh-tyń Qazaq­standaǵy elshisi Denıel Rozen­blıým myrza men jubaıy Sharon Vaksman hanym, AQSh-tyń Bas konsýly Mıshel Erkın jáne elshiliktiń qyzmetkerleri biz­de qonaqta boldy. Bas kon­sýl­dyń qy­zy ashtyq taqyrybynda tarı­hı izde­nis­ter júrgizedi eken. Bizdiń qor­daǵy qu­jat­tarmen, fotoalbomdarmen tany­syp, qun­dy jádigerlerge jolyqqanyn qýa­nysh­pen jetkizdi. Jalpy, mýzeıge shetel­dik­te­r­ tarapynan qyzyǵýshylyq jyl­dan-jyl­ǵa ósip keledi. Máselen, 2021 jyly 21 she­teldik azamat mýzeı qonaǵy bolsa, bıyl 8 aıdyń ózinde olardyń sany 300-ge jýyq­tady», dedi mýzeı dırektory Marııa Asqarova.

Elimizdegi saıası baǵyttaǵy qýǵyn-súr­­gin taqyrybyna arnap alǵash ashylǵan mý­zeı­­diń bir ereksheligi syrtqy sáýleti men ishki dızaıny ataýyna saı úılesim tapqan. Mýzeı «Ekspozısııalyq», «Taǵzym» jáne «Kıno» zaldarynan turady.

ShYMKENT