Eńbek kodeksine sáıkes jumys berýshi anasyna nemese ákesine bala úsh jasqa tolǵanǵa deıin bala kútimine baılanysty demalys berýge mindetti. Demalys kezinde jalaqy saqtalmaıdy, biraq dekrettik demalysqa shyqqan ata-anaǵa birneshe jeńildik beriledi, sonyń ishinde:
- bala týýyna baılanysty birjolǵy járdemaqy;
- respýblıkalyq bıýdjetten 1,5 jasqa deıingi bala kútimi boıynsha járdemaqy (jumys istemeıtinderge);
- memlekettik áleýmettik saqtandyrý qorynan tólenetin áleýmettik tólem.
Birinshi, ekinshi jáne úshinshi balaǵa respýblıkalyq bıýdjetten tólenetin birjolǵy járdemaqy mólsheri 38 aılyq eseptik kórsetkishti (AEK) nemese aǵymdaǵy jyly 131 100 teńgeni, tórtinshi jáne odan da kóp balaǵa – 63 AEK (217 350 teńge) quraıdy.
Respýblıkalyq bıýdjetten bala kútimi boıynsha aı saıynǵy járdemaqynyń mólsheri birinshi balaǵa – 5,76 AEK (19 872 teńge), ekinshi balaǵa – 6,81 AEK (23 495 teńge), úshinshi balaǵa – 7,85 AEK (27 083 teńge) quraıdy. Tórtinshi jáne odan da kóp balaǵa 8,90 AEK (30 705 teńge) tólenedi.
Eki nemese odan da kóp bala týǵan kezde kórsetilgen tólemder ár balaǵa taǵaıyndalady.
Balanyń kútimine baılanysty tabysynan aıyrylǵan jaǵdaıda tólenetin áleýmettik járdemaqy olar úshin áleýmettik aýdarymdar alynǵan jaǵdaıda anasyna nemese ákesine taǵaıyndalady. Aı saıynǵy tólem bala týǵanǵa deıin sońǵy 24 aı ishinde áleýmettik aýdarymdar tólengen ortasha aılyq tabystyń 40 paıyzyn quraıdy. Bul járdemaqy bala bir jarym jasqa tolǵanǵa deıin tólenedi. Bul rette, áleýmettik tólemniń eń tómengi mólsheri bıýdjetten tólenetin uqsas aı saıynǵy memlekettik járdemaqynyń mólsherinen kem bolmaýy, al eń joǵary mólsheri eń tómengi jalaqynyń jeti eselengen mólsheriniń 40 prosentinen aspaýy kerek.
Eńbek jáne halyqty áleýmettik qorǵaý mınıstrligi Áleýmettik qamsyzdandyrý jáne áleýmettik saqtandyrý departamentiniń málimeti boıynsha, 2023 jyldyń toǵyz aıynda jarty mıllıonǵa jýyq adam 198,6 mlrd teńge kóleminde áleýmettik tólem aldy. Alýshylardyń basym bóligi (99,7 paıyzy) áıelder bolsa, 0,3 paıyzy nemese 1551 adam er adamdar. Sonymen qatar, 457 er adam bıyl alǵash ret bul tólemdi aldy.
«Aǵymdaǵy jyldyń toǵyz aıynda áleýmettik tólemniń eń tómengi mólsheri 19 872 teńgeni (onyń ishinde erler úshin - 22 080 teńge), eń joǵarysy - 196 000 teńgeni qurady. Degenmen, áleýmettik tólemniń mólsheri bala týylǵanǵa deıingi sońǵy 24 aıdaǵy tabysqa baılanysty ekenin eskeremiz», - delingen Tengrinews.kz redaksııasynyń resmı saýalyna bergen jaýabynda.
