Sıfrlyq damý, ınnovasııalar jáne aeroǵarysh ónerkásibi birinshi vıse-mınıstri Qanysh Tóleýshın túrli sala mamandaryn aqparattyq tehnologııalar salasyndaǵy mamandyqtardy ıgerýge tartý mańyzdy ekenin tilge tıek etti. «Bizdiń áleýetimiz orasan zor ekenin kórip otyrmyz. Ártúrli salanyń azamattary aqparattyq tehnologııalar salasyndaǵy mamandyqtardy ómiriniń ajyramas bóligine aınaldyrǵan kezde áleýetimiz tolyq ashylady. «IT-Aiel» qatysýshylary alǵashqy qadam jasady. Sizderden úlgi alyp, erteń on myńdaǵan otandasymyz IT salasyna bet burary anyq», dedi vıse-mınıstr.
Búgingi tańda baǵdarlamaǵa qatysýshy 122 adam oqýdy aıaqtap, elektrondy sertıfıkat aldy. Qalǵany oqýdy jalǵastyryp jatyr. 10 aımaqtan 50 áıel veb-saıt nemese qosymsha sııaqty ózderiniń IT ónimderin jasap, fınaldyq kezeńnen ótip, sertıfıkat tabys etý rásimine qatysýǵa múmkindik aldy.
– Biz bul jobany qolǵa alǵan kezde onyń aýqymy men nátıjesi osynshalyqty bolady dep oılamadyq. Sizder búgingi kúnniń naǵyz batyrysyzdar. Sizder shynymen kóp adamnyń qolynan kelmeıtin nárseni istedińizder. Múldem jańa salaǵa aıaq bastyńyzdar. Kúrdeli ári básekege qabiletti salaǵa kirýden qoryqpadyńyzdar. Menińshe, bul baǵdarlama jyl saıyn ótetin bolsa, sizder óz úlgilerińizben, eńbekterińizben talaı áıelge jol ashtyńyzdar. Bálkim, bul sizderdiń jetistikke, álemge tanymal bolatyn ónim jasaýǵa, úlken tabysqa qaraı jasaǵan alǵashqy úlken qadamdaryńyz shyǵar, – dedi «Astana Hub» basqarýshy dırektory Alına Ábdirahmanova.
Osy aptada bes áıel qatysýshylardyń kásibı daǵdylaryn damytýǵa jáne eldegi áıelder kásipkerligin damytýǵa aıtýly úles qosatyn jobalaryn tanystyrdy. Mysaly, aqtóbelik Daıana Ahmetbaeva Welcome ımmıgranttardy áleýmettik ıntegrasııalaý qyzmetin usyndy. Dıana Sáýlebaeva ishki týrızmdi damytýǵa úles qosa alatyn saıt jasady. Samal Qasenova balaly otbasylarǵa arnalǵan ózara kómek qyzmeti – «MomSharing» jobasyn tanystyrdy. Al atyraýlyq Kórkem Qasenova avıasııalyq oqý ortalyǵynyń saıtyn jasady. Álııa Orazymbetova balalardyń qarjylyq, sıfrlyq jáne kompıýterlik saýattylyǵy boıynsha bıznes-joba daıyndap, ınteraktıvti oqytý ortalyǵyn ashýdy josparlap otyr.
«IT-Aiel» baǵdarlamasyna No Code School, Freelance School jáne kompıýterlik saýattylyq negizderi sııaqty kýrstardy oqý nıeti bar 18 jastan asqan 2 675 jumyssyz áıel ótinish bildirdi. Baǵdarlamada vebınarlar, sheberlik sabaqtary, tikeleı efırler, suraq-jaýap sessııalary boldy. О́tinishterdiń kóbi Astana qalasy men Aqmola oblysynan (847), Almaty qalasy men Almaty oblysynan (468), Batys Qazaqstan oblysynan (275), Atyraý oblysynan (179) jáne Aqtóbe oblysynan (120) túsken. Qatysýshylardyń ortasha jasy – 32 jas.
