Mádenıet jáne aqparat mınıstrligi men «Azamattyq bastamalardy qoldaý» ortalyǵy bastamasymen jer-jerde jumyssyz jastarǵa uıymdastyrylyp jatqan osy áleýmettik jobanyń tıimdiligi óte zor. Qazan aıynyń basynda 18-den 35 jasqa deıingi jumyssyzdarǵa qaıtarymsyz grant beriletini týraly Aqtóbe oblystyq jastar resýrstyq ortalyǵy saıtynda habarlama jarııalandy. Basty talap – qatysýshy enbek.kz saıtyna jumyssyz retinde tirkelýi kerek. Bir aıdyń ishinde 300-den asa jas keńes aldy, 160 ótinim tústi. Áleýmettik jelilerde uıymdastyrylǵan tikeleı efırlerde grant qarjysyn turǵyn úı qurylysyna, jer telimi men avtokólik satyp alýǵa, qorshaǵan ortaǵa zııanyn tıgizetin jobalarǵa salýǵa, qaıyrymdylyq sharalarǵa jumsaýǵa bolmaıtyny aıtyldy. О́tinimderdi irikteı kele, baıqaý talaptaryna saı kelgen 48 komıssııa qaraýyna usynyldy.
Oblystyq ishki saıasat basqarmasy jastarmen jalpy jumys bóliminiń basshysy Eleýsiz Nurǵalıevtiń aıtýynsha, «Zhas Project» jobasyna keıingi alty aıda jumys istemegen jastar qatysty.
«Oblystyq máslıhat depýtattary, «Atameken» óńirlik kásipkerler palatasy, BAQ ókilderi, sybaılas jemqorlyqqa qarsy qyzmettiń eriktilerinen quralǵan komıssııa músheleri jobanyń áleýmettik mańyzyna nazar aýdardy. Máselen, múgedektigi bar jas komıssııa músheleri aldynda óz jobasynyń ómirsheńdigin dáleldep shyqty. Onyń densaýlyq jaǵdaıyna qaramastan óz isin bastaýǵa degen erekshe qulshynysy óz qatarlastaryna úlgi bolarlyqtaı. Komıssııa músheleri taǵy bir qatysýshynyń qysqamerzimdi oqytý jobasyna nazar aýdardy», deıdi E.Nurǵalıev.
Temir aýdany Shubarqudyq kentiniń 23 jastaǵy turǵyny Danııar Sákenov aýyl jastaryn foto-beıne túsirilim jasaýǵa úıretip, grafıkalyq dızaın, mobılografııa kýrstaryna eki aı tegin oqytpaqshy. Ol grant qarajatyna qajetti jabdyqtar satyp alatynyn aıtty. Úmit Bojymbetova múmkindigi shekteýli balalardyń analary úshin kýlınarlyq taǵamdar pisirýdi úıretetin kýrs uıymdastyrady. О́ıtkeni múgedek balany baǵyp otyrǵan analar úıden tysqary jerde jumys isteı almaıdy. Sol úshin de jas analardyń úılerinde otyryp-aq belgili bir kásip túrin úırengeni abzal. Tursynaı Boranbaeva osy kezge deıin tapsyryspen quraq kórpeler tigip, eski jumsaq jıhazdardyń matasyn jańartyp aqsha taýyp júr.
«Bólmeniń ıntererine saı kórpeler tigýge tapsyrystar alyp júrmin. Tigýdi ózim úırendim. Men – damýy tejelgen balanyń anasymyn. Balam kópke qosylǵandy unatpaıdy. Ol ózimen qatarlas balalarmen erkin oınaı almaıdy, jalǵyz tastap ta kete almaısyń. Qazir arnaıy balabaqshaǵa baryp júr. Bir jaǵynan balamdy qarap, ekinshi jaǵynan tabys ta tapqym keledi. 1 mln teńge memleket qarjysy maǵan úlken qoldaý boldy. Oǵan tigin mashınalaryn satyp alamyn», deıdi 33 jastaǵy Tursynaı.
Mártók aýdanynyń 32 jastaǵy turǵyny Naýryzbek Erbatyrov kirsabyn jasaýdy qolǵa ala bastady.
«О́tken jyldan beri oıymda júrse de, qarajatym bolmaǵan soń jumys bastaı almadym. «Zhas Project»-ke bıznes-jobamdy usynyp jeńiske jettim. Endi Mártók aýylyndaǵy bir bos ǵımaratty jalǵa alyp, seh ashyp, kirsabyn jasaıtyn qural-jabdyq satyp almaqshymyn. Oǵan shıkizat aýyldan tabylady. Kirsabynǵa maldyń toń maıy men ósimdik maıynyń qaldyqtary kerek. Eń bastysy, men taza, tabıǵı, baǵasy arzan sabyndar jasap, aýdanymyzdaǵy dúkenderge arzan baǵamen ótkizýdi josparlap otyrmyn. Jabdyqtar kelse, bir aıda ónim shyǵara bastaımyn. Sabyn jasaıtyn qurylǵylar ártúrli bolady. Shıkizaty jetkilikti bolsa, kúnine 1 500-2 000 dana sabyn shyǵaratyn jabdyqtar bar. Biraq men ondaı kólemde shyǵara almaımyn. Kúnine 500 dana sabyn daıyndap satylymǵa jibere alsam, óte jaqsy bolar edi. Osy jumysty jolǵa qoıǵan soń suıyq sabyn óndirisin bastaımyn», deıdi ol.
Qaıtarymsyz qarjyǵa qol jetkizgen grant ıegerleri eki aı qarjylyq basqarý, esep júrgizý kýrstarynan ótedi. Jumyssyz aýyl jastaryna arnalǵan osyndaı naqty qoldaý aýyldaǵy kásip túrlerin keńeıtýge jol ashady ári salyq bazasyn da molaıtady.
Aqtóbe oblysy
