Dostyqty jalaý etken jarysqa oblystyq «Saryarqa» telearnasy men «Birinshi Qaraǵandy» telearnasy, «Saryarqa Aqparat» medıaholdıngi jáne jýrnalıstıka kafedrasynyń ustazdarynan jasaqtalǵan komanda qatysty.
Komanda jetekshilerimen tartylǵan jerebe boıynsha alańǵa «Saryarqa» telearnasy men «Birinshi Qaraǵandy» telearnasynyń komandasy shyqty. Eki komanda da dop soǵýǵa ábden ákkilengen jýrnalıster bar eken. Degenmen «Birinshi Qaraǵandydaǵy» qyz-jigitter 2:0 esebimen jeńiske jetip, fınalǵa joldama aldy.
Jýrnalıstıka kafedrasy men «Saryarqa Aqparat» medıaholdınginiń komandasynyń oıyny da tartysty órbidi. Eki komandada kúndelikti sportpen shuǵyldanyp júrgen shymyr oıynshylar bar. Birinshi kezdesýde medıaholdıng jeńiske jetti.
Ekinshi kezeńde de «Saryarqa Aqparat» esepte alǵa ájeptáýir uzap ketken edi. Biraq kafedradaǵylar oıyn sońynda jınaqtalyp alyp, basym tústi. Jalpy esep 1:1 boldy. Qorytyndy kezdesýde ábden voleıbol oıynyna mashyqtanyp alǵan jýrnalıstıka kafedrasynyń komandasy aıqyn jeńiske jetti.
Aqtyq kezeńde jýrnalıstıka kafedrasy «Birinshi Qaraǵandy» komandasyn da utyp aldy. Al «Saryarqa Aqparat» telearnalyq áriptesterin eki kezeńde de jeńip, júldeli orynnan kórindi. Bul týrnırdiń basty maqsaty – dostyqty tý etý. Áriptestikti ármen qaraı nyǵaıtý.
– Bul alańda qarsylas joq. Bárimiz – áriptespiz, dospyz. Qyzmet barysynda ǵana emes, osyndaı sporttyq sharalarda da bas qosaıyq. Sport – adamdardy bir-birine jaqyndastyrady. О́zara baılanysty, aýyzbirshilikti kúsheıtedi. Árdaıym sportpen shuǵyldanyp, sergek júreıik. Dostyǵymyz jasaı bersin, – dedi fılologııa fakýltetiniń dekany Eldos Túıte.
Qarsylastaryn tájirıbeli oıynymen tań qylǵan alań ıeleri jol berdi. Kýbokterin «Birinshi Qaraǵandy» komandasyna tabystady. Sóıtip, 2-oryn «Saryarqa Aqparat» medıaholdıngine, 3-oryn «Saryarqa» telearnasyna buıyrdy. Jýrnalıster de bir mezgil mıkrofonyn, qalamyn, dıktofonyn qoıyp, boı jazyp qaldy. Uıymdastyrýshylar osy týrnırdi dástúrge aınaldyratyndaryn jáne jetkizdi.
QARAǴANDY
