Ekpe alý úshin qala turǵyndary turǵylyqty jeri boıynsha emhanaǵa júginýi qajet. Qosymsha jappaı ımmýndaý (QJI) úshin egý kabınetteri jumys kúnderi saǵat 8.00-den 18.00-ge deıin jumys isteıdi. Immýndaý júrgizilmes buryn dáriger pasıentpen qyzylshanyń aldyn alýy boıynsha aqparatpen, ekpeden keıin bolýy múmkin aǵzadaǵy reaksııalar boıynsha túsindirme jumysyn júrgizedi.
«Qyzylshaǵa qarsy qosymsha jappaı ımmýndaýdyń qajettiligi elimizde jáne Astana qalasynda qyzylshamen syrqattaný jaǵdaıynyń kúrt ósýine baılanysty týyndap otyr. Naýqastardyń kópshiligi – balalar. Qyzylsha ınfeksııasynyń taralýyna ekpe almaǵan balalardyń kóptigi de yqpal etip otyr. Munyń sebebi – ata-analardyń vaksınalaýdan bas tartýy, negizsiz medısınalyq shettetýler, egilý merzimin keıinge qaldyrý. Qyzylsha ınfeksııasynan qorǵalmaǵandar – 6 aıdan 11 aıǵa deıingi kishkentaı balalar. Bul jastaǵy balalardy omyraý sútimen beriletin analyq ımmýnıtet qorǵamaıdy jáne dál osy balalar ekpe jasyna áli jetpegen. Sebebi qyzylshaǵa qarsy josparly túrde egilý 1 jastan bastalady. Balalarymyzdy qorǵaýdyń jáne qyzylshanyń taralýyn toqtatýdyń jalǵyz joly – vaksınalaý», dep habarlady Qoǵamdyq densaýlyq saqtaý basqarmasynyń baspasóz qyzmeti.
