Aldymyzda jatqan arnaıy kıimdi bar-joǵy 19 sekýnd ishinde kıip, shartty túrde órt bolǵan orynǵa shyǵyp ketýimiz kerek eken. Ár sekýnd – órttiń órshýi, ár sekýnd – bireýdiń ómiri. Sondyqtan barynsha shıraq qımyldaýǵa tyrystyq. Qorbıyp jatqan brezent kıimdi áp-sátte kıip alǵanymyzben, tanaýǵa maskany, basqa kaskany kıe almaı tosyldyq. Arqamyzǵa aýa toly temir ballondy artqanda qyzdar jaǵy táltirektep qalǵan. Sonda da qyzyl jalynnyń arasynan júgirip ótip, tonnel ispetti tar qubyrmen tómen quldılady. Bul kezeńnen sátti ótkenderi nysanaǵa dáldep sý shashty. Qysymdy kúsheıtken saıyn qoldaǵy shlangany ustap turý da bálendeı ońaı sharýa emes ekenine kóz jetti. Budan soń órt shyqqan altynshy qabatqa terezeden kirýimiz kerek boldy. Buıryq – solaı. Biz júgirip jetkenshe, terezege qaraı arnaıy tehnıkadan baspaldaq sozyldy. Bir-birlep órleı jóneldik. Arqadaǵy 6 kg ballonnyń salmaǵy tipten aýyr tarta bastaǵan sekildi. Baspaldaqtyń basyna taıaǵanda qos ókpe entigip, tynys alý aýyrlaǵan. Aıaqtaǵy rezeńke etiktiń de salmaǵy sezildi. Keıbir áriptester bıigine jete bere basy aınalyp, baspaldaqqa jabysa jata qalysqan. Onynshy, on tórtinshi qabattarǵa osylaı kóterilsek qaıter edik? О́zińdi kóterip shyqqanyń bylaı tursyn, tútinge tunshyqqan turǵyndardy arqalap túsýiń kerek bolsa she? Qutqarýshylardyń, órt sóndirýshilerdiń qyzmetteri ońaı emes, bilemiz. Biraq bul joly sony sezindik. Kóz ashtyrmaıtyn qara tútinniń arasymen de júrip kórdik.
Qyzmette janyn shúberekke túıip júretin órt sóndirýshilerdiń qaı-qaısysyn aıtsaq ta, batyr der edik. Jazǵa salym Semeı ormany otqa oranǵanda órt sóndirýshiler dál osylaı asaı-múseılerin asynyp, aıǵa jýyq órtpen arpalysqanyn kórdik qoı. Onyń aldynda Batys Altaıdy tilsiz jaý sharpyp, aptalap sóndirgen. О́rt sóndirýshilerdiń ómir men ólim arasynda júretinin Úkimet eskerip, jalaqylaryn kóteripti. Soǵan qýandyq. Qazir órt sóndirý bólimine á dep jumysqa ornalasqan azamat qolyna 180 myń teńgeniń kóleminde jalaqy alady. Buryn 70-80 myń teńgeniń tóńireginde ǵana edi. Birtindep tehnıkalary da jańaryp jatqan kórinedi.
Shartty qoıylǵan órt sóndirilip, tútin tunǵan ǵımarattan tysqa shyqqanymyz sol edi, japa-tarmaǵaı jarysa jetken «jýrnalıster» jan-jaqtan sýretke túsirip, nege keshiktińizder degen sekildi suraqtardy qarsha boratty.
– Uzaq kıindik. Kıine sala órt shyqqan jerge júgireıik desek, artyp alǵan ballon aýyr. Qımyldaı almaı qaldyq. Qysqasy, órt sóndirýshilerdiń jumysyn bir sát sezinip kórdik. Eńbekterińiz eren. Sizderdi Shyǵystaǵy BAQ ókilderi atynan kásibı merekelerińizben quttyqtaımyz! – dep jyly lebizin bildirdi saıt tilshisi Anel Abzalbekova.
Endigi jumys úıindiniń astynda qalǵan adamdy qutqarý edi. Qolymyzda – 20 tonnadan asa aýyrlyqty kóteretin qurylǵy. Jalpaǵynan jatqan betondy op-ońaı kótere saldy. Qıynǵa soqqany – úıindiniń arasynan 60-70 kg tartatyn mýlıajdy alyp shyǵý edi. Alýy alyp shyǵyp, birinshi medısınalyq kómek kórsetýdi de úırendik. Jalpy, alǵashqy medısınalyq járdemdi ár azamat kórsete bilýge tıis.
– Qyzyqty shara ótti. Jýrnalıster esh daıyndyqsyz kelip, shartty qoıylǵan órtti sóndirýge kiristi. Kórsetkishteri jaman emes. Biz de tilshilik qyzmettiń qyr-syryn túsindik. Jedel ári naqty aqparat taratýǵa tyrystyq, – dedi ShQO TJD bastyǵynyń orynbasary Arman Toqanov.
Shyǵys Qazaqstan oblysy
