Áriptesimiz – «Ásker medıa» jeńimpazy

Qorǵanys mınıstrligi uıymdastyrǵan is-sharaǵa Prezıdent keńesshisi – Prezıdenttiń baspasóz hatshysy Berik Ýálı, Mádenıet jáne aqparat mınıstrliginiń, ózara qarym-qatynas organdarynyń ókilderi, respýblıkalyq buqara­lyq aqparat quraldarynyń basshylary, mem­lekettik organdardyń baspasóz hatshylary, jýr­nalıster men blogerler qatysty.

Festıvalde Qorǵanys mınıstri, general-polkovnık Rýslan Jaqsylyqov áskerı taqyrypta maqala jazyp, sıýjet túsirip júrgen jýrnalısterdi BAQ ókili ǵana emes, eń aldymen eliniń patrıottary retinde sanaıtynyn atap ótti.

– Mundaı jobalar buqaralyq aqparat quraldarymen yntymaqtastyqty nyǵaıtýǵa yqpal etedi, azamattardyń armııaǵa degen ashyq­tyǵy men senimin arttyrady. Ásker taqy­rybyn qozǵap júrgenderge alǵysym sheksiz. Sizderge jańa jobalar men shyǵarmashylyq tabystar tileımin, – dedi ol.

Kesh barysynda «Qyzmet etemin» jáne «Aqsaýyt» baǵdarlamasynyń prodıýserleri Iýlııa Vasılenko men Sáýle Myqtybaeva, «Sarbaz» portalynyń bas redaktory Tımýr Kýbekov mınıstrdiń atynan alǵys hattar aldy. Mádenıet jáne aqparat mınıstrligi Aqparat komıtetiniń tóraǵasy Eldos Náshir­áli áskerı jýrnalıstıka ardagerlerin qut­tyqtap, Saparǵalı Jaǵyparov pen Qaıyr Dúnbaıanovqa «Aqparat salasynyń úzdigi» tósbelgisin taǵyp, Dýlat Moldabaevqa Qurmet gramotasyn tabys etti.

Qorǵanys mınıstrligi «Ásker Medıa-2023» respýblıkalyq baspasóz festıvalin osymen tórtinshi ret ótkizip otyr. Mınıstrliktiń bas­pasóz hatshysy Rýslan Jangýlınniń aıtýynsha, baıqaýǵa 200-den astam jumys kelip túsken. Erejege sáıkes oǵan 2023 jyldyń 1 qańtarynan 31 qazanyna deıin BAQ-ta jarııalanǵan jumystar usynylǵan bolatyn. Qazylar alqasy olardy baǵalaý kezinde avtordyń kásibı sheberligin, taqyryptyń ózektiligin jáne materıaldy berý ereksheligin nazarǵa alǵan.

Sonymen «Bes qarý» – úzdik televızııa­lyq baǵdarlama atalymynda «Eýrazııa birinshi ­arnasy» telearnasynan Áıgerim Muzdy­baeva jeńiske jetse, radıodaǵy úzdik jumysy úshin «Daýylpaz» atalymynda «Qazradio» radıojýrnalısi Baǵdagúl Rahmetqyzy úzdik dep tanyldy.

Baspa basylymyndaǵy úzdik jumysy úshin «Aldaspan» atalymynda «Egemen Qazaqstan» gazetiniń jýrnalısi Eskendir Zulqarnaıdyń jumysy úzdik dep tanyldy. Qazylar alqasy «Sózsemser» atalymynda «Inbusiness.kz.» aqparattyq agenttiginiń qyzmetkeri Maksım Morozovtyń jumysyna úzdik baǵa berdi.

Úzdik fotojumysy úshin «Raýan» atalymynda «Lıter» gazetiniń fototilshisi Pavel Mıheevtiń sýretteri kósh bastady. Blo­gerlerdiń «Qamshyger» dep atalatyn sanatynda bloger Tımýr Asylhanov jeńiske jetti.

Úzdik áskerı sholýshyny anyqtaıtyn «Dilmar» atalymynda qazylar alqa­sy «Sputnik.kz» aqparattyq agenttiginiń jýr­na­lısi Aleksandr Mıroglovtyń ju­mysyna basym­dyq berdi. Bul salada jańadan kórinip júrgen jas jýrnalıs­ter de qazylar alqasyna óz jumystaryn jol­daǵan eken. «Jas órken» sanatynda Erkenaz Hanatbaı jeńiske jetti.