Otyrysqa mınıstrliktiń basshylyq quramy, Qarýly Kúshter túrleriniń bas qolbasshylary, óńirlik qolbasshylyqtar áskerleriniń, Desanttyq-shabýyldaý áskerleriniń, ásker tekteriniń qolbasshylary, áskerı bólimderdiń, aýmaqtyq qorǵanys brıgadalarynyń komandırleri, qorǵanys isteri jónindegi departamentteri men áskerı oqý oryndarynyń bastyqtary qatysty.
Mınıstr qorǵanys salasynyń barlyq qyzmeti Joǵarǵy Bas qolbasshy qoıǵan mindetterdi oryndaýǵa baǵyttalǵanyn atap ótti. Armııany qarý-jaraqpen jáne tehnıkamen jaraqtandyrý, áskerı ınfraqurylymdy salý jáne jóndeý, áskerlerdi materıaldyq-tehnıkalyq quraldarmen qamtamasyz etý jumystary iske asyryldy. Bıyl qorǵanys salasy Prezıdenttiń qatysýymen Búkilarmııalyq keńes pen «Batyl toıtarys-2023» oqý-jattyǵýlaryn ótkizdi, bul rette Memleket basshysy áskerlerdiń daıarlyq deńgeıin joǵary baǵalady.
Prezıdenttiń tapsyrmasymen Áskerı-patrıottyq tárbıe tujyrymdamasy ázirlenip, onyń jeke baqylaýymen áskerı qyzmetshilerdiń áleýmettik mártebesi máseleleri sheshilip keledi.
– Bıyl ushqyshtar quramy men joǵary oqý oryndaryndaǵy azamattyq oqytýshylardyń jalaqysy orta eseppen – 60, sondaı-aq áskerı dárigerlerdiń jalaqysy 40 paıyzǵa ósti, osylaısha olar azamattyq sala medısınalyq mekemelerdegi jalaqy deńgeıine jetkizildi. 2024 jyldan bastap áskerı ataqtar úshin tólenetin ústemeaqyny 30 paıyzǵa kóterý kózdelgen. Barlyq áskerı qyzmetshilerdiń jalaqysyn kóterý máseleleri de pysyqtalyp jatyr. Turǵyn úı tólemderiniń deńgeıi udaıy ósip keledi, – dedi Qorǵanys mınıstri.
General-polkovnık R.Jaqsylyqov budan bólek basqarý organdary men senip tapsyrylǵan bólimsheler jumysynyń sapasyna nazar aýdardy.
– Bólimshelerdi jeke qurammen tolyqtyrý máseleleri sheshýdi talap etedi. Ofıserler men serjanttardyń kásibı deńgeıin arttyrý boıynsha jumys isteý qajet. Bul aspektiler áskerı ujymdardaǵy moraldyq-psıhologııalyq ahýalǵa jáne quqyqtyq tártiptiń jaı-kúıine tikeleı áser etedi. Qarý-jaraq pen áskerı tehnıkany jaramdy jáne jaýyngerlik ázirlikte ustaý, ınfraqurylymdyq nysandardy kútip ustaý men olarǵa qyzmet kórsetýdi jetildirý mańyzdy, – dep atap ótti ol.
Otyrysta Qorǵanys mınıstriniń birinshi orynbasary – Bas shtab bastyǵy, general-leıtenant Marat Qusaıynov eseptik kezeńdegi áskerlerdiń jaýyngerlik jáne jumyldyrý daıyndyǵynyń jaı-kúıi týraly baıandady. Dástúrli jáne gıbrıdti kúres ádisteri keńinen qoldanylatyn qazirgi zamanǵy qarýly qaqtyǵystardyń erekshelikterine toqtala kelip, Qarýly kúshter áskerı agressııa jaǵdaıynda qarsylasqa ońtaıly qarsy turýǵa ázir bolýy kerek ekenin atap ótti.
Otyrys barysynda Qorǵanys mınıstriniń orynbasarlary óz baǵyttary boıynsha jumys nátıjeleri jóninde esep berdi. Olardyń baıandamalarynda áskerı jáne quqyqtyq tártip, Qarýly kúshterdi tehnıkalyq, tyldyq, medısınalyq qamtamasyz etý jáne páterlerdi paıdalaný máseleleri jan-jaqty qamtyldy.
Alqa otyrysy qorytyndysy boıynsha Qorǵanys mınıstri áskerlerdiń jaýyngerlik qabileti men jaýyngerlik ázirligin odan ári arttyrý, olardy tehnıkalyq jaraqtandyrý, tyldyq jáne moraldyq-psıhologııalyq jaǵdaıdy qamtamasyz etý jóninde birqatar mindet qoıdy. Áskerı basqarý júıesin sıfrlandyrý úderisin jedeldetý arnaıy tapsyryldy.
Basshylyq quram oqý-ádistemelik jıynnyń qorytyndysyn shyǵardy. Qarýly kúshter arasyndaǵy jaýyngerlik jarystyń jeńimpazy ataǵyn Áýe qorǵanysy kúshteri aldy. Ásker tekteri men óńirlik qolbasshylyqtar arasynda Desanttyq-shabýyl áskerleri birinshi bolsa, ekinshi oryndy ÁShQQ áskerleri, úshinshi oryndy Áskerı-áýe kúshteri ıelendi.
2023 oqý jylynyń qorytyndysy boıynsha qyzmettegi jetistikteri úshin 18404 áskerı bóliminiń komandıri, podpolkovnık Almas Tólegenov elimizdiń tuńǵysh Qorǵanys mınıstri, Halyq qaharmany, armııa generaly Saǵadat Nurmaǵambetovtiń tósbelgisine ıe bolyp, kýbokpen marapattaldy.
