Osy aýyldan bulardan basqa da talaı eńbek erleri shyqty. Oblystyq atqarý komıteti tóraǵasynyń birinshi orynbasary bolǵanda 11 jyl boıy óńirdiń aýyl sharýashylyǵy salasynyń damýyna basshylyq jasaǵan Jaqsylyq Ysqaqov aǵamyz da – osy Bulaqtiki. Qazir bul aqsaqaldyń keýdesinde jeti orden jarqyraıdy. Osyndaı eńbekte únemi alda bolǵan úlgini aǵa urpaq aýyldyń jastarynyń boıyna da sińirgeni kórinip júredi. Bulaq aýyldyq okrýginiń qazirgi ákimi, aýyldyń tól týmasy Bolat Beısenbaev ta – oblystyń eń ozyq aýyl ákimderiniń biri. Ol oblystyq, aýdandyq bıýdjetten aýyldyń áleýmettik jaǵdaıyna bólinetin qarajatty shyp-shyrǵasyn shyǵarmaı bóldirip, okrýgtegi úsh aýyldyń da jaǵdaıyn jaqsartyp keledi. Munda aýylǵa jaryq tartý, aýyz sýyn jetkizý, kóshelerin jóndeý, tipti joldaryna asfalt tóseý sııaqty jumystar úzilmeıdi.
Osyndaı eńbekqor, moınyndaǵy mindetine jaýapkershilikpen qaraǵan azamattar arasynan shyqqandar aýyldan basqa jerlerde de úlken tabystarǵa jetýde. Sonyń biri – Aıyrtaý aýdanyndaǵy «Orlınogor» orman sharýashylyǵynda on jyldan asa ýaqyt eńbek etip kele jatqan Sábıt Mustafın. Ol Bulaq aýylynda týyp, osyndaǵy mektepti bitirip, er jetken azamat.
Jýyrda Respýblıka kúni qarsańynda Sábıt Prezıdent Qasym-Jomart Toqaevtyń qolynan ol III dárejeli «Eńbek dańqy» ordenin aldy. Bul madaq oǵan erinbegen eńbektiń, óziniń mindetine degen adaldyǵynyń arqasynda keldi.
Bulaq aýyly jan-jaǵy jasyl orman, jarqyraǵan kólderi de bar, tabıǵaty erekshe sulý mekenge ornalasqan. Sábıt bala kezinde qurdastarymen birge ormanǵa jıi baryp, jıdek, búldirgen teretin. Asyr salyp oınap, hosh ıisti ormannyń saf aýasymen tynystaıtyn. Onyń ústine ormanshy bolǵan atasynyń inisi Qabdolla Bekhojınniń de jumystaryn kórip ósken. Atasynyń salt atpen orman aralap, onyń tynyshtyǵyn baqylap júrgenin, keıde ormannyń ishin tazalatyp jatqanyn, jurtqa otyndyq aǵash berip jatqanyn jıi kóretin. О́ziniń de ormanshy bolý armany sol kezderde oıanǵan eken.
Ormanǵa degen súıispenshilikti bala jasynan boıyna sińirgen Sábıt Mustafın de óziniń ómirin ormanshylyqpen ushtastyrdy. Ol Býrabaıdaǵy orman sharýashylyǵy kolledjine túsip, ormanshy-tehnık mamandyǵyn alyp shyǵyp, Aıyrtaý aýdanyndaǵy «Orlınogor» orman sharýashylyǵy kásipornyna jumysqa turady. Bul aýdan – Sábıttiń týǵan aýylynyń jerimen japsarlas jatqan meken. Jas mamandy jumysqa qabyldaǵan burynǵy dırektory Temirjan Sákenov oǵan úlken úmit artyp, jasyl ormanǵa jatsań-tursań janashyrlyq bildirýdi umytpa dep ósıet aıtqan eken. Úlken kisiniń senimin aqtaýǵa tyrysqan Sábıt óz mindetine yjdahatpen kirisip, áli kúnge osy talap deńgeıinen tómendegen emes. Sábıttiń óz jumysyn adal atqaryp, mindetine jaýapkershilikpen qaraıtynyn dırektory talaı ret atap ótken. Temirjan aǵa zeınet demalysyna ketken soń byltyrdan beri onyń ornyna kelgen Tımofeı Semenovpen de Sábıt ortaq til taýyp jumys istep keledi.
Ormanshynyń mindeti – ormandy órtten saqtaý, sýyq qoldy adamdardyń orynsyz kesýine, búldirýine jol bermeý bolsa – Sábıt baqylaıtyn 2 363 gektar jerdiń orman ýchaskesinde eshqashan ondaı tótenshe jaǵdaı bolǵan emes. Bul Sábeńniń attan túspeı ormandy jıi aralaýynyń, aǵashty kúzetip qana qoımaı ondaǵy ań-qustardyń saqtalýyna da únemi nazar aýdaryp otyrǵanynyń arqasy dep aıtsaq, qatelespeımiz. Sábıttiń ózi: «Ormandy saqtap qalý úshin tynbaı eńbek etemiz. О́rtten, zańsyz aǵash kesýshilerden attan túspeı qorǵaımyz. Biz tipti ań-qustardyń aman bolýyna qaraılasamyz. Munda zańsyz ańshylyq jasaýǵa bolmaıdy. Aǵash bolǵasyn ań-qus bolý kerek. Tabıǵatta bári bir-birimen úılesken ǵoı», deıdi. Sóıtip, Sábıt Mustafın ormanshy ǵana emes ýchastogindegi ań-qustardy qorıtyn qoryqshy mindetin de atqaryp keledi.
Ormanshynyń mindetine jyl saıyn kóktem men kúzde jańa óskinderdi otyrǵyzý jumystary da júktelgen. Bıylǵy kúzde Sábıttiń qaraýyndaǵy ýchaskege 127 gektar jerge jańa óskin egildi. Bul da – onyń ýchastoginiń ozyq ekeniniń kórinisi. Ýchastok ormanynyń 60 paıyzy qaraǵaı, biraq sońǵy jyldary qaıyń egýdi kóbeıtken.
«Sábıt – óte qarapaıym, jaqsy adam. Áriptesteriniń ortasynda syıly. Onyń óz jumysyna adaldyǵyn biz basqalarǵa únemi úlgi qylamyz. Sábıt moınyna júktelgen mindettiń bárin tııanaqty oryndaıdy. Sondyqtan men Sábıt Qaıranasulynyń Prezıdenttiń qolynan alǵan marapatyn laıyqty dep sanaımyn», deıdi «Orlınogor orman sharýashylyǵy» KMM dırektorynyń orynbasary Erlan Bekmaǵambetov.
S.Mustafındi orman qorǵaýdan sharshap qaıtqanda úıishilik jylylyq qarsy alady. Mektepte psıholog bolyp isteıtin kelinshegi Kúlderaı men qyzy otaǵasynyń jumysynyń ońaı emes ekenin, onyń kúni boıy attan túspeı, orman aralaǵandyqtan sharshaǵanyn birden sezip, demalýyna barlyq jaǵdaıdy jasap baǵady.
Sábıttiń eren eńbegin eli aqtap, basshylar qostap oǵan elimizdiń joǵary nagradasyn berdi. «Bul jalǵyz meniń emes, sharýashylyǵymyzdyń barlyq eńbekkerleriniń jetken tabysy dep bilemin. Bizdiń oblysymyzda men sııaqty 500 ormanshy bar. Olardyń bári de tynymsyz eńbek etip, jasyl baǵymyzdy qorǵaýda. 2025 jylǵa deıin Prezıdenttiń talabyna sáıkes 120 mıllıon kóshet egýdi de mejdelep otyrmyz», deıdi ol. Adamǵa jaıly kúı syılaıtyn jasyl ormannyń qorǵaýshysyna biz de sáttilik tiledik.
Soltústik Qazaqstan oblysy
