Ákimniń aıtýynsha, aýqymdy jobany iske asyrý eldi mekenderdi de, oǵan qosa kóp otyn kólemin qajet etetin iri ınvestısııalyq jobalardy da gazdandyrýǵa múmkindik beredi. Aıta ketý kerek, Qostanaı oblysynda aýyldyq eldi mekenderdiń tek 28%-y ortalyq gazben qamtamasyz etilgen. Sondyqtan bul jobanyń óńir turǵyndary úshin mańyzy zor.
Memleket basshysy Qasym-Jomart Toqaev bıylǵy qańtar aıynda Qostanaı oblysyna jumys sapary kezinde Aqtóbe oblysynan Qostanaıǵa deıin magıstraldyq gaz qubyryn salý jóninde tapsyrma bergen edi. Energetıka mınıstrligi «QazagGaz» UK» AQ-men birlesip, birden tehnıkalyq-ekonomıkalyq negizdeme ázirleýge kiristi. Qazirgi ýaqytta jumys tolyq qarqynmen júrip jatyr.
«Bolat ónerkásibine arnalǵan shıkizat – ystyq krıketti temir óndirý jobasyn iske asyrý úshin gazdyń úlken kólemi qajet bolady. Sonymen qatar qajetti shıkizat bazasy men bilikti kadrlar bar, endigi kezekte halyqaralyq sapa jáne ekologııa standarttaryna sáıkes keletin túpkilikti ónim shyǵarý, tereń óńdeý óndirisin jolǵa qoıý qajet», dedi Roman Sklıar.
Premer-mınıstrdiń orynbasary ákimdik aldaǵy ýaqytta da óńirdi gazdyń qosymsha kólemimen qamtamasyz etý máselesin eskere otyryp, ınvestısııalyq jobalardy iske asyrýdy úılestirý boıynsha ınvestorlarmen jumys júrgizýi tıis ekenin aıtty.
Oblys ákimdigi bul jobany iske asyrý óńir úshin qýatty serpilis ekendigin atap ótti. Bul joba respýblıkanyń qoldanystaǵy gaz tasymaldaý jelisimen baılanystyrýǵa múmkindik beredi jáne óńirdiń tabıǵı gaz boıynsha qajettiligin, onyń ishinde básekege qabiletti óndiristi damytý úshin artyp kele jatqan qajettilikterin qamtamasyz etedi.
