Jyl basynda Qostanaıda «Kia» avtomobılderiniń shaǵyn toraptyq óndirisin iske qosý rásimine qatysqan Prezıdent ónerkásip kooperasııasyn odan ári keńeıtý jáne ınjenerlik bazany qalyptastyrý mańyzdy ekenin atap ótken edi.
Joǵary jalaqy tólenetin 1 500 jumys ornyn qurýǵa múmkindik beretin jańa zaýyt jylyna 70 myń avtokólik shyǵarady. Jobaǵa shamamen 250 mln dollar tikeleı sheteldik ınvestısııa salynady.
Qurylys jumystary 2024 jyly aıaqtalady dep josparlanǵan. Odan ári óndiriske qajet qurylǵylar men jabdyqtar ornatyla bastaıdy. 2025 jyldyń birinshi toqsanda zaýyt qanatqaqty rejimde iske qosylmaq. Al ekinshi toqsanda óndiris tolyq ashylady.
Qurylys alańynyń resmı ashylý saltanatyna Premer-mınıstrdiń birinshi orynbasary Roman Sklıar, О́nerkásip jáne qurylys mınıstrligi О́nerkásip komıteti tóraǵasynyń orynbasary Shyńǵys Súıinbaev qatysty.
Saltanatty rásimde Roman Sklıar «Kia» kompanııasy alǵash ret Koreıa Respýblıkasynan tys jerde birlesken kásiporyn men zaýyt salýǵa tikeleı ınvestısııa salyp otyrǵanyn atap ótti.
«Qostanaıda «Kia» avtomobılderin shyǵaratyn tolyq sıkldi zaýyt salýdy mashına jasaý salasy úshin shyn máninde serpindi joǵary tehnologııalyq joba dep ataýǵa bolady. Bul joba naqty mýltıplıkatıvti áser beredi, ınjenerlik jáne tehnıkalyq kadrlardyń jańa býynyn daıarlaý deńgeıin arttyrýǵa, sondaı-aq lokalızasııalaýdyń kelesi kezeńine kóshýdi aıtarlyqtaı jedeldetýge múmkindik beredi. Osyndaı negizgi ınvestory bar zaýyttyń paıda bolýy otandyq ónerkásipti damytýdyń mańyzdy kezeńi, ekonomıkanyń barlyq salasynda Ońtústik Koreıamen bolashaq birlesken ınvestısııalyq jobalar úshin aıqyn úlgi bolady», dedi Roman Sklıar.
Qurylys alańynyń ashylý rásiminde «Kia Corporation» prezıdenti jáne bas dırektory Ho Sýn Sonnyń aldyn ala jazylǵan beınehabarlamasy kórsetildi. «Qazaqstan Respýblıkasynyń ekonomıkasyn damytýǵa úles qosý múmkindigine ıe bolý – «Kia» úshin úlken maqtanysh. Qostanaıdaǵy jańa zaýyt azamattarǵa, ýnıversıtet túlekteri men ınjenerlerge joǵary deńgeıdegi tájirıbe jınaýǵa múmkindik beretin biregeı jumys oryndaryn usynatyn bolady», deıdi alpaýyt kompanııa basshysy.
«Kia» kompanııasy avtomobıl jasaýdaǵy jergilikti qamtý deńgeıin arttyrýda Qazaqstannyń ónerkásiptik saıasatyna tolyq qoldaý kórsetýge daıyn ekenin bildirdi. «Kia» qazir Qostanaıda lokalızasııalaý ortalyǵyn ashý boıynsha kóp jumys atqaryp jatyr. Munda shaǵyn jáne orta kásipkerlerdiń qatysýymen avtokóliktiń quramdas bólikteri shyǵarylmaq.
Oblys ákimi Qumar Aqsaqalov ozyq álemdik tájirıbelerge júgine otyryp, zamanaýı joǵary tehnologııalyq kásiporyndy iske qosý respýblıkanyń avtomobıl jasaýdaǵy óndiris kólemin ulǵaıtýǵa yqpal etetinine senim bildirdi.
«Mashına jasaý salasyn damytý óńirdiń damýyna mýltıplıkatıvtik turǵydan áser etedi. Atap aıtqanda, mashına jasaý salasynda bir jumys ornyn qurý basqa salalarda bes-alty jumys ornynyń qurylýyna septigin tıgizedi. О́ndiristerdi lokalızasııalaý deńgeıin arttyrý úshin jańa zaýyttyń aınalasynda quramdas bólshek jetkizýshileri retinde shaǵyn jáne orta bıznes beldeýi qurylady», dedi Qumar Aqsaqalov.
Koreıa Respýblıkasynyń Qazaqstandaǵy elshisi Te-ık Chjo Qazaqstan men Ońtústik Koreıa 30 jyldan astam ýaqyt boıy ózara tıimdi áriptestikti nyǵaıtyp kele jatqanyn atap ótti.
«Búginde eki el Prezıdent Qasym-Jomart Toqaevtyń Qazaqstan halqyna Joldaýynda aıtylǵan ekonomıkalyq reformalarǵa saı keletin yntymaqtastyqty is júzinde belsendi damytyp jatyr. Bul reformalar óńdeý salasyn damytý arqyly respýblıka ónerkásibin ártaraptandyrýǵa baǵyttalǵan», dedi elshi.
Qostanaı oblysy
