Jaqyp Asanov óz sózinde Memleket basshysynyń elordany damytý máseleleri jónindegi keńeste Astanany kógaldandyrý isinde máseleler bar ekenin aıta kelip, jumys ádisterin ózgertý qajettigine toqtalǵanyn eske saldy.
«Bul máseleni zerdelegende birneshe aýqymdy másele baıqaldy. Olardyń ishinde eki negizgi ári eń ózekti máseleni erekshe atap ótýge bolady. Birinshisi – sý tapshylyǵy. Mamandardyń pikirinshe, ony sheshýdiń eń tıimdi jáne utymdy ádisi – qubyr sýyn paıdalaný. Qubyrdaǵy sýda tek tabıǵı sý ǵana emes, sonymen qatar aǵyn sý da bar. Ony qaıta óńdeýge jáne barynsha paıdalanýǵa bolady. Aǵash otyrǵyzý jumystary básekeles ortaǵa berildi. Memlekettik satyp alýda kim jeńiske jetse, sol aǵash otyrǵyzady. Mundaǵy eń mańyzdy ólshem – baǵa. Konkýrstarda jeńiske jetken kompanııalar arzanǵa satyp alynǵan kóshetterdi otyrǵyzyp, ketip qalady. Olar aǵashtyń bolashaǵyna alańdamaıdy. Bul másele de mańyzdy», dedi Jaqyp Asanov
Ekologııa jáne tabıǵı resýrstar mınıstrliginiń ókilderi senatorlarǵa jasyl elordanyń jaı-kúıi jáne osy erekshe jobany odan ári damytý jospary týraly aıtyp berdi. Al Astana qalasy ákimdiginiń basshylyǵy qalany kógaldandyrý salasynyń ózekti máseleleri jáne olardy sheshý joldarymen bólisti.
Kezdesýge Parlament Senatynyń depýtattary, ekologııa jáne tabıǵı resýrstar mınıstri Erlan Nysanbaev, Astana qalasynyń ákimi Jeńis Qasymbek, múddeli memlekettik organdardyń ókilderi jáne Astana qalasy máslıhatynyń depýtattary qatysty.
Depýtattar kezdesý qorytyndysy boıynsha usynymdar ázirlenip, aldaǵy ýaqytta úkimetke jiberiletinin atap ótti.
