Qıyndyqqa qaıyspaǵan

Turǵyn úılerdi kútip-ustaý – elimizdegi ózekti máselelerdiń biri. Bul baǵyttaǵy barynsha tıimdi forma áli tabylǵan joq. Qaısybir jyly MIB-terdi qurý qolǵa alyndy. Burynǵy kon­domıným, PIK-terge qa­ra­­ǵanda munyń tıimdileý ekeni baıqaldy. «Bir úı – bir qo­jaıyn». Demek jınalǵan qara­jatty qalaı, qaıda jumsaısyń, sol úı ıeleri ózderi aqyldasyp, she­ship otyrady. О́zi turatyn úıdiń jertólesin jóndetý úshin talaı esikti tozdyrǵan О́mirhan «mynaý durys eken» degen oıǵa keldi. Kórshilerimen aqyl­dasty. Biraq kópshiligi maquldaı qoımady. «Talaı jyl aqshany beker tóledik pe? Burynǵy PIK jaqsylap jóndep bersin, sosyn MIB degendi qursaq qu­raıyq» desti. Biraq bulaı bola qoımaıtyny belgili edi. Eger burynǵy qojaıyn bárin áp-ádemi etip, jaınatyp qoıatyn bolsa, bılik turǵyn úılerdi bas­qarýdyń jańa formasyn iz­destirip qaıtedi?

Sodan ózin maquldaǵan birdi-ekili kórshilerin ertip qalalyq ákimdikke bardy. О́zderiniń oıyn aıtty, kómek surady. Ákim­­dik qujat daıyndaý j­a­ǵy­nan jaqsy járdemdesti. Qar­jylaı kómektese almaıtyndaryn ashyq aıtty. Jertóleni tazartý, qubyrlardy aýys­tyrý, t.b. jumystarǵa ájep­táýir qarajat kerek. Kim bere qoısyn? О́mirhan ári-beri oılanyp táýekelge bardy.

Otyz jyldan asa ártúrli me­kemelerde júrgizýshi bolyp eńbek etken ol 2012 jyly aıaq astynan júrek aýrýyna ushy­rap, operasııa jasatýǵa májbúr bolǵan edi. Bul alǵashqy operasııa bolatyn. Ol sodan soń taǵy da densaýlyqty jaqsartý maqsatymen úsh ret pyshaqqa tústi. Qazirdiń ózinde jylyna eki márte Astanadaǵy ortalyqqa baryp, em qabyldap turady. О́zi 3-toptaǵy múgedek bolsa, zaıyby Sáýle Ermekbaıqyzy Baıbatyrova – 2-toptaǵy múge­dek. Shahtada 33 jyl boıy bir jerde marksheıder bolyp is­tegen Sáýle 2013 jyldan beri 14 márte operasııaǵa túsipti. «Me­niń ómir súrip júrgenim – qa­zirgi zamanǵy medısına jetis­tikteriniń arqasynda», deıdi ol.

– Kezekti operasııa jasatýǵa qajet bolyp qalady-aý dep jınaǵan azdy-kópti aqshany MIB qurýǵa jumsap jiberdim. О́ıtkeni kórshilerdiń kóńilinde senim uıalatý kerek boldy. Sóı­tip, jertóle tolyqtaı tazartylyp, tozyǵy jetken sý, jylý, kanalızasııa júıeleri propı­lenge aýystyryldy. Mine, solaı bastadyq, – deıdi О́mekeń jańa isti qalaı qolǵa alǵany jóninde.

О́zi de, zaıyby da múgedek О́mirhannyń atqaryp jatqan jumysy kórshilerin súısintip tastady. Olar «kóz qorqaq, qol batyr» ekenin kózimen kór­di, janymen sezindi. Sodan beri bir úıdegi 65 páterdiń turǵyn­darynyń aýyzbirligi, tatýlyq, yntymaǵy burynǵydan arta tústi. Fıodor Soldatov, Denıs Bessarabov tárizdi kórshileri qazir О́mekeńniń qasynan qal­maıdy. Qandaı sharýa bolsa da kómegin aıamaıdy. Jaz, kúz mezgilinde aptasyna kórshi­lerdiń bári birdeı bir kisideı senbilikke shyǵyp, úıdiń aınalasyn tazartyp turady. Bul olar úshin kezekti bir eńbek me­re­kesi ispetti. «Burynnan be­ri osylaı nege istemegenbiz?» deı­di ózara áńgime arasynda.

Qala ákimdigi kommýnaldyq qyzmet kórsetýshiler arasynda jyl saıyn baıqaý ótkizip turady. Byltyrǵy baıqaýda júlde retinde О́mekeńniń MIB-ine beınekamera berildi. Úıdiń aldynda ákelip ornatyp qoıdy, qazir endi sonyń paıdasyn kórip te jatyr. Mysaly, jaz mezgilinde esik aldyna jaıyp qoıylǵan jýylǵan kıimderdi alyp ketken suǵanaq qoldyń ıesin polısııa qyzmetkerleri sol beınekameradan qarap, taýyp aldy.

«О́mir-90» – Ulytaý obly­syndaǵy eń alǵash qurylǵan múlik ıeleriniń birlestigi. Al ony qurǵan kim? Nebir soqtaldaı jigitter aýyzben oraq oryp, syn aıtýdan árige bara almaı júrgende táýekelge bara bilgen 3-toptaǵy múgedek azamat qoı. О́mirhan Qudaspaev báıbishesi ekeýi eki ul, bir qyzynan 10-nan asa nemere súıip otyr. Taǵdyr bir jaǵynan qyspaqqa alyp qysqanmen, qıyndyqqa qaıyspaǵan janǵa qyzyǵyn da úıip-tógip bere salatyn sekil­di me, qalaı? О́mirhan Qu­das­paevtyń ómiri sondaı oıǵa jeteleıdi.

Ulytaý oblysy,

Sátbaev qalasy