Jıynda Densaýlyq saqtaý mınıstrliginiń medısınalyq kómekti uıymdastyrý departamentine qarasty basqarmanyń basshysy Gúlnar Maqsutova mınıstrlikten kórsetilip jatqan qoldaýlar jaıynda aıtty.
– Jyl saıyn 14 qarashada Qant dıabetimen kúres kúni atalyp ótedi. Osy kúnde qant dıabetin emdeýdiń ádisteri men aldyn alý sharalary týraly usynys-pikirler aıtylady. Qant dıabeti – elde áleýmettik mańyzy bar aýrýlardyń qatarynda. Sondyqtan pasıentter mindetti áleýmettik medısınalyq saqtandyrý sheńberinde tegin emdele alady. Elimizdegi klınıkalyq hattamalar qant dıabetin zertteý boıynsha jetekshi kásibı ǵylymı qaýymdastyqtardyń standarttaryna sáıkes keledi. Sonymen qatar únemi qaıta qaralyp, jańarady. Memleket qant dıabetimen ómir súretin adamdarǵa qoldaý kórsetedi jáne pasıentterdi barynsha dárilik zattarmen, qajetti emmen tegin qamtamasyz etedi. Tegin emdeletin pasıentterge senimdi dáleldi bazasy bar preparattardyń barlyǵy derlik qoljetimdi, sondaı-aq olar jalpy saqtandyrý aıasynda dıagnostıkalyq skrınıngten ótedi, – deıdi G.Maqsutova.
Kúndelikti tirshiliktiń qamymen júrgen turǵyndardyń edáýir bóligi óziniń qant dıabetimen aýyratynyn birden bile bermeıdi eken. IDF derekteri boıynsha 2021 jyly elde 808 myń adam qant dıabetimen alysyp ómir súrgen. Onyń ishinde 320 myńǵa jýyq otandyq dıagnoz qoıylmaǵan qant dıabetine shaldyǵypty. Konferensııa barysynda Densaýlyq saqtaý mınıstrliginiń shtattan tys balalar endokrınologi Gúlmıra Ábdýahasova dıabettiń taralýynyń negizgi sebepteri jaıynda aıtyp berdi. Sebebi qant dıabetimen aýyrǵan naýqastar jyldan-jylǵa kóbeıip, balalardan da jıi anyqtalatyn bolǵan. Densaýlyq saqtaý mınıstrliginiń deregi boıynsha byltyr elimizde 5 447 bala aýrýdyń osy túri boıynsha esepte turǵan.
Dıabettik ata-analar komıtetiniń prezıdenti Rýslan Zákıev komıtettiń atqaryp jatqan jumysy týraly áńgimeledi. Negizi komıtet pasıentterge kútim kórsetý sapasyn, olardyń ómir súrý sapasyn jaqsartý maqsatynda qant dıabetimen aýyratyn naýqastardy aqparattandyrýmen, qorǵaýmen aınalysady. Osydan soń «Novo Nordısk Kazahstan» JShS bas dırektory Rana Azfar Zafar qant dıabetimen kúreste kompanııanyń qolǵa alǵan mindetteri jóninde baıandady.
– Kompanııa qant dıabetimen kúreste úzdiksiz medısınalyq bilim berý boıynsha jobalardy iske asyrady. Ǵylymı zertteýge kóńil bóledi. Qant dıabetimen ómir súretin adamdar úshin terapııanyń ınnovasııalyq ádisterin paıdalana otyryp sheshimder usynady. Sonymen qatar eresekter men balalarǵa arnalǵan qant dıabeti týraly aqparattyq materıaldardyń basyn qurýǵa bastamashy bolyp keledi. Kompanııa bıyl jáne keler jyly halyqty qant dıabeti jóninde aqparattandyrý boıynsha jumysty jalǵastyrady, – dedi kompanııa basshysy.
Konferensııa sońynda taraptar qant dıabetine shaldyqqan pasıentterdi emdeýde úzdik nátıjege qol jetkizý úshin kúsh biriktirýdiń mańyzyn atap ótti.
