Taıaýda ǵana Meksıkanyń Kankýn qalasynda ótken qorytyndy týrnırde top jaryp, búgingi tańda álemniń birinshi raketkasy atanyp otyrǵan 22 jastaǵy Iga Sventektiń esepshotyna 9,86 mln dollar kóleminde qarajat aýdaryldy. Ekinshi oryndy Arına Sobolenko ıelenip otyr. Rasynda da, bıylǵy maýsym Belarýstiń ókili úshin óte tabysty boldy. Ol Aýstralııanyń ashyq birinshiliginde top jaryp, US open dodasynyń fınalynda óner kórsetti. Rolan Garros pen Ýımbldonda jartylaı fınalǵa deıin jetti. Sobolenkonyń tabysy – 8,20 mln dollar. Úshinshi jáne tórtinshi oryndardy AQSh-tyń qos myqtysy – Koko Gaýff pen Djessıka Pegýla ózara bólisti. Alǵashqysy – 6,67 jáne ekinshisi – 5,97 mln-dy enshiledi.
Tórtinshi orynǵa bizdiń Elena Rybakına turaqtady. Qazaqstannyń Týy astynda óner kórsetip júrgen 24 jastaǵy arý bıyl 5,49 mln dollar oljalady. Bir qýantarlyǵy, byltyr Ýımbldonnyń jeńimpazy atanǵannan keıin ol elimizdiń daryndy jastaryn qoldaý úshin 35 mln teńge kóleminde qarajat bóldi. Sonyń arqasynda 14 jas oıynshynyń árqaısysy 2,5 mln teńgeden aldy. Bul – Qazaqstannyń basqa da saqa sportshylary úshin úlgi bolatyndaı quptarlyq is. Sondaı-aq mol oljaǵa kenelgender qatarynda chehııalyq Marketa Vondroýshova (4,47 mln), Karolına Mýhova (2,80 mln), Petra Kvıtova (2,49 mln), mysyrlyq Ons Jaber (3,19 mln) jáne grekııalyq Marııa Sakkarı (2,55 mln) syndy tanymal tennısshiler bar.
