Foto: iba.sport
Tórt jylda bir ret ótetin jazǵy Spartakıadaǵa kásipqoı boksqa aýysqan álem chempıony Bekzat Nurdáýletov, Tursynbaı Qulahmet, Nursultan Amanjolov syndy boksshylar da kúshin synaýǵa bel býyp otyr. Biraq Qytaıdyń Hanchjoý qalasynda ótken jazǵy Azııa oıyndarynda kúmis júlde ıelengen asa aýyr salmaqta synǵa túsetin Qamshybek Qońqabaev, ulttyq quramanyń kapıtany, álem chempıony Aslanbek Shymbergenov syndy sańlaqtar qatyspaıdy.
Kelesi jyly Parıjde ótetin jazǵy Olımpıada oıyndarynda boksshylar tek jeti salmaq dárejesinde aıqasady. Sondyqtan da básekelestik óte joǵary bolmaq. Mysaly 51 keli salmaqta eki birdeı álem chempıony dodaǵa qosylyp otyr. Álem chempıony, London Olımpıadasynyń qola júldegeri Sáken Bıbosynov (Túrkistan oblysy), 19 jasynda álem chempıony atanǵan Sanjar Táshkenbaı da 48 keliden 51 keli salmaq dárejesine ótti. Demek, eki sańlaq irikteý kezeńinde súrinbese, 19 qarasha kúni fınalda altyn medal úshin aıqasady. Astana rınginde jastar da jalyndap kele jatqanyn baıqatty. Mysaly 60 keli salmaq dárejesinde kópshilik kútpegen nátıje tirkeldi. Buǵan deıin de Qazaqstan chempıonatynda top jaryp, olja salyp júrgen Ádilet Qurmetov (Túrkistan oblysy) Jetisý oblysynyń 19 jastaǵy jas boksshysy Almaty Ábdýálıge ese jiberdi.
