Foto: parlam.kz
«Prezıdent Mańǵystaý oblysyna barǵan saparynda qajetti 34 naqty tapsyrma bergen bolatyn. Sol tapsyrma boıynsha mańyzdy is-sharalar jospary bekitildi. Mańǵystaý oblysynda osy jyly bir emes úsh ret issaparda bolǵanyńyzben, óńirde Prezıdent tapsyrmalarynyń oryndalý nátıjesi mardymsyz. Búgingi kúnde sol tapsyrmanyń tek beseýi ǵana iske asyrylyp otyr. Qalǵan 29 is-shara toqtap tur. Onyń ishinde О́nerkásip pen qurylys mınıstrligine berilgen alty tapsyrma, «Samuryq-Qazynaǵa» qatysty úsh tapsyrma, «Báıterek» ulttyq basqarýshy holdıngine júktelgen bir tapsyrma, Ulttyq ekonomıka mınıstrligine tıesili jeti, Aýylsharýashylyǵy mınıstrligi atqarýy tıis eki tapsyrma da oryndalmaǵan. Atap aıtqanda, Aqtaý – Fort Shevchenko, Taýshyq – Shetpe joldarynyń jáne Quıylys – Aqtaý sý jelisin salý, týrızm úshin Kaspııdiń jaǵalaýyn damytý sekildi mańyzdy jobalar. Osylaı tizimdi jalǵaı berýge de bolady», dedi Májilis depýtaty.
S.Musabaev toqtap qalǵan óndiristerdi jandandyrý jóninde júktelgen tapsyrmalar da iske aspaǵanyn aıtty. Jumyssyzdyq kún sanap artqan Jetibaıda istep turǵan armatýra shyǵaratyn seh «Samuryq-Qazyna» men «Qazmunaıgazdyń» kedergi keltirýinen toqtap qalǵanyn jetkizdi. Bul Prezıdenttiń bıznesti qoldaý jónindegi tapsyrmasyn oryndaýǵa qarsy sabotaj emes pe degen saýalyn kóldeneń tartty. Úkimet basshysyna memlekettik jáne kvazımemlekettik mekeme basshylarynan esep alýdy, atqarylmaǵan tapsyrma boıynsha naqty sharany iske asyrýdy, bıýdjetten tıisti qarajat qarastyrýdy, ár toqsan saıyn atqarylǵan jumys jónindegi esepti Májiliske joldaý jolǵa qoıylýy tıis ekenin aıtty.
