Jańa kitaptyń alǵashqy esteligi Qazaqstannyń Eńbek Eri, aqyn Muhtar Shahanovpen bastalypty. «Ulttyq múddege tereń tamyr jibergen Qaldybektiń eń basty qasıeti – onyń shyndyq bıiginen tabyla bilýinde», dep baǵa beredi ol.
Talantty kompozıtordyń el ishine taralǵan «Qarııalar azaıyp bara jatyr», «Kirmeshi jıi túsime», «Án-aǵa nemese Shámshimen syrlasý», «Jaıyqtyń tolqyndary» týyndylary halyqtyń súıip tyńdaıtyn ánderine aınalyp, qazaq mýzykasynyń altyn qoryna endi. Avtor atalǵan jańa jınaqqa eki jyl boıy daıyndalǵan.
«Eki jyl buryn júregime kúrdeli ota jasaldy. Sol kezde qansha ǵumyrym qaldy eken dep oıladym. Aman qaldym ǵoı, áıteýir. Kitabymdy kim shyǵarady? Ul-qyzdarym bar ǵoı. Biraq óz ánderińniń taǵdyryn ózińnen artyq eshkim bilmeıdi. Ánderim – meniń perzentim sııaqty. Árqaısysynyń minezi bar. Júregimnen jaryp shyqqan ánderimniń halyqqa jetkeni de, jetpegeni de bar. Moıyndalǵany, áli ánshisin tappaǵandary bar. Sondyqtan osy fotoalbom-kitabymdy shyǵarǵym keldi. Bul – meniń tuńǵysh jarııalanyp otyrǵan kitabym, alǵashqy qarlyǵashym. Men ótirik án jazyp, ózimdi aldaǵan emespin. 40-qa jýyq án jazyppyn. Onyń ishinde 10-ǵa jýyǵy – halyqqa tanymal ánder. Men ónerge adal bolǵan janmyn. О́nerden basqa meniń eshkimim joq», deıdi Q.Qurmanáli.
Aty ańyzǵa aınalǵan «Qazaq valsiniń koroli» Shámshi Qaldaıaqovpen kózi tirisinde kezdesip, tyrnaqaldy týyndylaryna oń baǵasyn alǵan kompozıtordy kópshilik búginde «Shámshi aǵanyń eskegi», «Shámshi murasynyń shyraqshysy» atap ketken.
