Ardagerler Ulytaýda aqyldasty

Ulytaý oblysy ákimdiginiń qoldaýymen ótken is-sharaǵa el óńirlerindegi ardagerler uıym­darynyń jetekshileri men ókilderi qatysty. Ulytaý oblys­tyq máslıhatynyń tór­aǵasy Baýyrjan Shyńǵysov oblystaǵy ardagerlerge qatys­ty atqarylyp jatqan is-sha­ralar jóninde málimet berip, jas urpaqty otandyq patrıotızmge tárbıeleýde Aýǵanstan soǵysy men Chernobyl apatyn joıýǵa qatysýshylardyń eńbegi orasan ekenin atap ótti. Sondaı-aq Ulytaý oblystyq áleýmettik baǵdarlamalar jáne densaýlyq saqtaý basqarmasy basshylary, jergilikti Qorǵanys isteri jónindegi departament ókilderi ózderine tıisti baǵytta ardager­lerge kórsetilip jatqan qyzmetteri men kómekteri jaıynda aıtty.

Forýmda «Qazaqstan Ar­da­gerleri» qaýymdastyǵy ókil­deri kelesi jyly atap ótiletin keńes áskeriniń Aýǵanstannan shyǵarylǵanyna 35 jyldyǵyna oraı júrgizilip jatqan jumystar týraly málim etti. Búgingi tań­da Qorǵanys mınıstrliginiń úılestirýimen Úkimet janyndaǵy vedomstvoaralyq jumys toby qurylǵan. Bul topta basqa da mınıstrlikter men oblys ákimdikteriniń basshylyq ókil­deri, sonymen qatar birneshe qoǵam­dyq uıymnyń ókilderi bar. 35 jyldyqqa arnalǵan jospar boıynsha óńirlerde áskerı-patrıottyq is-sharalar ót­kizý, saltanatty keshter uıym­dastyrý, qa­ıy­rymdylyq aksııa­lar, me­rekelik medal ázirleý jáne bas­­qa da áleýmettik-rýhanı baǵ­dar­lamalar qarastyrylǵan.

«Qazaqstannyń Chernobyl ardagerleri qaýym­dastyǵy Or­talyq keńe­siniń» tóraǵasy Qu­saıyn Mustafa da Chernobyl apatyn joıýǵa qatysýshylardyń búgingi tańdaǵy áleýmettik jaǵ­daıy, osy baǵytta qoǵamdyq uıym­dar tarapynan jasalyp jat­qan jumystar týraly oıyn ortaǵa salyp, birqatar usynysyn aıtty. Sondaı-aq «Qazaqstannyń Aýǵanstan soǵysy jáne jergilikti qarýly qaqtyǵystar ardagerleri respýblıkalyq oda­ǵy» uıymy tóraǵasynyń orynbasary Serik Osanov, Pav­lodar oblystyq «Aýǵanstan soǵysy ardagerleri odaǵy» uıy­mynyń tóraǵasy Baıǵabyl Maıkotov áskerı-patrıottyq klýbtardyń jumysyn jańǵyrtý boıynsha oılaryn or­taǵa saldy. Máselen, bir ǵana Pav­lodar óńirinde Aýǵanstan soǵysy ardagerleri uıymdary janynan uıymdastyrylǵan 40-qa jýyq áskerı-patrıottyq klýbtar jumys istese, keıbir óńirlerde mun­daı jumys júrgizilmeıdi eken.

Jezqazǵan qalasynda ótken ardagerler forýmynda ardager­lerge beriletin memlekettik jár­demaqynyń kólemin ulǵaıtýǵa, medısınalyq saqtandyrý boıynsha jeńildik qarastyrýǵa, turǵyn úımen qamtamasyz etý jóninde usynys bildirýge uıǵarym jasaldy. Sonymen qatar óńirlerdegi áskerı-patrıottyq klýbtardyń jumysyn jańǵyrtý maqsatynda ár jyl saıyn bir óńirde ardager­ler uıymdary janyndaǵy ás­kerı-patrıottyq klýbtardyń sle­tin ótkizý týraly bastama kóterildi.

Ǵalym QOJABEKOV,

jýrnalıst