Foto: gov.kz
Nurjan Nurjigitov 2024 jyldyń 1 qańtarynan bastap Qazaqstan Halyqaralyq Araldy qutqarý qoryna tóraǵalyq etetinin, sondyqtan elimiz Ortalyq Azııa memleketterimen, sondaı-aq basqa da halyqaralyq uıymdar men qarjy ınstıtýttarymen yntymaqtastyqty arttyrýǵa daıyn ekenin málimdedi. Mınıstr Qazaqstan Memleket basshysynyń óńirde Ortalyq Azııanyń barlyq elderiniń múddelerin eskeretin Halyqaralyq sý-energetıkalyq konsorsıým qurý jónindegi bastamalaryn iske asyrýǵa nıetti ekenin atap ótti.
Elshi BPCA-nyń birinshi kezeńi aıaqtalýǵa jaqyn ekenin aıtty, sondyqtan qazirgi ýaqytta baǵdarlama ókilderi ekinshi kezeńde qandaı baǵyttardy qamtý kerektigin anyqtaý úshin Ortalyq Azııa elderine barady. Sonymen qatar Qazaqstan, Qyrǵyzstan, Tájikstan, Túrikmenstan, О́zbekstan qatysatyn gıdrogeologııalyq boljaý baǵdarlamasy О́zbekstanda iske qosylyp jatyr. Atalǵan baǵdarlama Ortalyq Azııa elderi arasyndaǵy sý aǵyndary men sý shyǵynyn baqylaýǵa múmkindik beredi.
Blue Peace Central Asia ókilderi olardyń jobasy birneshe baǵytty qamtıtynyn atap ótti. Atalǵan joba, mysaly Halyqaralyq Araldy qutqarý qory jáne Dúnıejúzilik bank iske asyryp jatqan Ortalyq Azııa úshin sý-energetıkalyq baǵdarlamasy (Cawep) sheńberinde sý resýrstaryn basqarýdyń óńirlik ınstıtýttaryn nyǵaıtý, sarapshylardy tartý jáne tájirıbe almasý, transshekaralyq gıdrotehnıkalyq qurylystardy jańǵyrtý jáne rekonstrýksııalaý, sondaı-aq ártúrli kýrstar men trenıngter arqyly kadrlar daıarlaý jáne olardyń biliktiligin arttyrý sekildi birneshe baǵyttardy qamtıdy.
«Kelesi jyly biz Dúnıejúzilik bankpen birge júzege asyryp jatqan Kishi Araldy saqtaý jobasynyń ekinshi kezeńin bastaýdy josparlap otyrmyz. Sondyqtan biz Blue Peace-pen birlesip Ortalyq Azııa elderiniń sý-energetıka salasyndaǵy ózara is-qımyly máselelerimen jumys istegimiz keledi. Sondaı-aq biz jańa kadrlar daıarlaýǵa jáne sý salasynda jumys istep júrgen mamandardyń biliktiligin arttyrýǵa múddelimiz. Bizdiń yntymaqtastyǵymyz tyǵyz ári jemisti bolady dep senemin», dedi Sý resýrstary jáne ırrıgasııa mınıstri Nurjan Nurjigitov.
