Issapar barysynda mınıstr ómiri men shyǵarmashylyǵy Qazaqstanmen tikeleı baılanysty otandyq jáne reseılik mádenıet jáne óner qaıratkerlerimen kezdesti. Is-sharaǵa mýzykanttar, ánshiler, rejısserler, akterler, ádebıet qaıratkerleri, músinshiler men sýretshiler qatysty. Jıynda Aıda Balaeva ánshi Álııa Kıkenovaǵa «Shapaǵat» medalin tabystady.
«Men úshin bul joǵary marapatty alý óte mańyzdy. Árdaıym, barlyq jerde qazaq mádenıetin talmaı nasıhattap kelemin. Sol eńbegimniń elimiz tarapynan eskerilýi maǵan jumysymdy júıeli jalǵastyrýǵa sony serpin beredi», dedi Á.Kıkenova.
Júzdesýde mádenıetti damytý, mamandardyń biliktiligin arttyrý jáne mádenıet qaıratkerlerin qoldaý máseleleri sóz boldy. Qatysýshylar elimizdiń Mádenıet jáne aqparat mınıstrliginiń túrli formattaǵy yntymaqtastyq qadamyna úlken qyzyǵýshylyq tanytty. A.Balaeva Reseıdegi qandastarymyzdyń elimizdiń sahnalarynda óner kórsetýine, olardyń shyǵarmalaryn qazaq oqyrmandary men óner janashyrlarynyń arasynda keńinen nasıhattaýǵa daıyn ekenin jetkizdi. Mınıstr sýretshiler men músinshilerdiń sheberlik sabaqtaryn, semınarlaryn, kórmelerin ótkizý jobalaryna erekshe yqylas tanytty.
Is-shara aıasynda A.Balaeva Reseı Federasııasynyń Mádenıet mınıstri Olga Lıýbımovamen júzdesti. Taraptar eki eldiń mádenıet salasyndaǵy yntymaqtastyǵy týrasynda áńgime órbitti. Sóz arasynda reseılik mınıstr Qazaqstan men Reseıdiń ózara jumys, tájirıbe almasý baǵytynda áleýeti zor ekenin atap ótti. О́z kezeginde A.Balaeva: «Dostyq qarym-qatynastyń arqasynda mádenı-gýmanıtarlyq baılanystar joǵary deńgeıde damyp, eki halyqty baılanystyrýshy kópir bolyp keledi» dep, ózara is-qımyldy nyǵaıtýdy ilgeriletetin birqatar basym baǵytqa toqtaldy.
«Murajaı salasyndaǵy yntymaqtastyq, tájirıbe almasý jáne mýzeı qyzmetkerleriniń biliktiligin arttyrý erekshe qyzyǵýshylyq týdyrady. Qazaqstanǵa tarıhı jádigerler men mádenı qundylyqtardy qaıtarý máselesi ózekti. Bul Memlekettik qordyń kıno muraǵattaryna da qatysty», dedi ol. O.Lıýbımova máseleni zerdelep, qoldan kelgenshe kómek kórsetýge ýáde berdi. Ári «Qazaqfılmge» qatysty Reseı Federasııasynyń Memlekettik kıno qorynyń muraǵattaryn tapsyrýdyń erekshe mańyzdylyǵyn atap ótti.
«Bul – Qazaqstan úshin erekshe mánge ıe tamasha mura. Biz muny jaqsy túsinemiz jáne uzaqqa sozylǵan máseleni sheshemiz», dep atap ótti RF Mádenıet mınıstri. Buǵan qosa ol bıyl 125 jyldyǵyn atap ótken Chehov atyndaǵy Máskeý kórkem teatrynyń gastroldik saparyn uıymdastyrý arqyly teatr salasyn damytý boıynsha birlesken jobany júzege asyrý máselesin qarastyrýdy usyndy. Taraptar Qazaqstan – Reseı balalar shyǵarmashylyǵyn damytý, balalar ortalyqtary men murajaılaryn qurý, kitaphana isi, shyǵarmashylyq ındýstrııa salasynda tájirıbe almasý múmkindikterin pysyqtady. Sondaı-aq Eýrazııalyq kınematografııa óneri akademııasyna qatysty máselelerdi qarastyrdy.
«Qazaqstanda biregeı 12 murajaı-qoryq bar. Bul – álemge áıgili Qoja Ahmet Iаsaýı kesenesi ǵana emes, halqymyzdyń mádenı murasynyń basqa da qundy nysandary. Biz reseılik jas ǵalymdardy osy taqyrypta oqýǵa, jumys júrgizýge jáne ǵylymı maqalalar jazýǵa shaqyryp, ǵylymı volonterlik jobalardy uıymdastyrýǵa múddelimiz», dedi A.Balaeva.
Qazaqstan Mádenıet jáne aqparat mınıstriniń barlyq usynysyna reseılik áriptesi yqylas pen qoldaý bildirdi. Jalpy, sapa basshylarynyń kezdesýinde elder arasyndaǵy mádenı-gýmanıtarlyq baılanystardyń nyǵaıýy men damýyna úles qosatyn yntymaqtastyq pen tájirıbe almasýdyń mańyzdylyǵy sóz boldy.
Forým aıasynda 56 resmı delegasııa basshynyń qatysýymen «Mádenı egemendik – memlekettik biregeıliktiń negizi» atty basqosý ótti.
«Qazaqstan Memleket basshysy Qasym-Jomart Toqaevtyń «El birligi – onyń áralýandyǵynda!» degen basty qaǵıdatyn ustanady. Biz búginde osy dıalog alańynda otyrǵan kóptegen memleketpen ortaq tarıhymyz baryn maqtan tutamyz, osy baı murany bolashaq urpaq úshin saqtaýǵa, damytýǵa umtylamyz. Ǵasyrlar boıy rýhanı ári tyǵyz baılanysta ómir súrý arqyly ultymyz mádenıettiń ózindik ereksheligin jınaqtaýǵa jáne damytýǵa, mádenı kodty anyqtaýǵa, saqtaýǵa, basqa halyqtardan eń jaqsysyn alýǵa múmkindik aldy», dedi A.Balaeva.
Mınıstr mádenıet salasy memleketaralyq dıalogti damytýǵa, ekijaqty qatynastardy nyǵaıtýǵa eleýli úles qosatynyn aıtty. Oǵan Qazaqstannyń Reseı Federasııasymen yntymaqtastyǵy aıqyn mysal bola alady. Munda mádenı-gýmanıtarlyq sala – halyqtar arasyndaǵy negizgi baılanystyrýshy kópirdiń biri. О́zara qarym-qatynas birqatar mazmundy ári tabysty jobaǵa negizdelgen. Máselen, Qazaqstannyń Reseıdegi jáne Reseıdiń Qazaqstandaǵy kúnderi aıasynda «Orys maýsymdary», «Abaı álemi» taǵy basqa bastamalar arqyly tyǵyz mádenı qarym-qatynas ornady.
«Mundaı jobalar úlken suranysqa ıe bola otyryp, áleýmettik, iskerlik bastamalardy, aqparattyq jáne mádenı baılanystardy arttyrýǵa jol ashady, ekijaqty baılanystyń tereńdeı túsýine yqpal etedi, dep túıindedi mınıstr.
Kezdesýde delegasııa basshylary arasynda syndarly dıalog ótti. Qatysýshylar mádenıetti damytý, mádenı birlikti saqtaý máseleleri boıynsha pikir almasty.
