Foto: kapital.kz
Qazirgi tańda elimizdegi joldardyń 3 myń 200 shaqyrymynda aqyly júıe engizilgen. Bıylǵy 11 aıdyń qorytyndysy boıynsha aqyly joldardan bıýdjetke 26 mlrd 500 mln teńge qarajat túsken. Kólik mınıstrligi keler jyly aqyly joldar kólemin kóbeıtip, qosymsha 1 myń 200 shaqyrym jolǵa aqyly júıe engizýdi josparlap otyr.
«Memleket basshysynyń tapsyrmasyna sáıkes, qazirgi kezde avtojol salasyn reformalaý boıynsha birqatar jumys júrgizilip jatyr. 2029 jylǵa deıin rekonstrýksııalaý jumystarynyń aıaqtalýyna qaraı, aqyly joldardyń kólemi 11 myń shaqyrymǵa jetkiziletin bolady», dedi Marat Qarabaev Úkimet otyrysynda.
Qazir qurylys maýsymy aıaqtalýyna baılanysty «QazAvtoJol» ulttyq kompanııasy joldardy qys mezgiline daıyndaýǵa kirisken. Joldardy qysta kútip ustaý úshin 142 myń tekshe metr qum jáne 25 myń tonna tehnıkalyq tuz jınalǵan. Sońǵy jyldary qurylys jumystary kóleminiń artýyna baılanysty 4 jolaqty joldardyń úlesi artqan. Bul óz kezeginde jol-paıdalaný tehnıkasynyń sanyn arttyrýdy talap etedi.
«Osy qajettilikti sheshý úshin, «QazAvtoJol» ulttyq kompanııasy bıyl qosymsha 379 tehnıka satyp aldy, onyń 245-i ónerkásipti damytý qory arqyly, 25 danasy jol júrý aqysy jáne 109 birligi amortızasııalyq aýdarymdar esebinen alynady. Degenmen de áli de 1100-den astam tehnıka jetispeıdi. Sondyqtan О́nerkásipti damytý qorynan jeńildetilgen nesıe alý arqyly tehnıkalardy tolyqtyrý jumystary jalǵasady», dedi Kólik mınıstri.
