Stopfake.kz málimetinshe, Facebook-te QR Prezıdentiniń sýretin júkteı otyryp, alaıaqtar jalǵan aqparat taratýda. Qasym-Jomart Toqaevtyń atynan alaıaqtar árbir Qazaqstan azamatyna áleýmettik tólem tóleýdi ýáde etedi.
Feık anyq bolýy úshin Qamys-Jomart Toqaevtyń sýretin de jazbada paıdalanady. Alaıda Qazaqstannyń memlekettik organdarynyń saıttarynda, onyń ishinde QR Prezıdentiniń akorda.kz saıtynda mundaı tólemder týraly resmı aqparat joq. Bul týraly buqaralyq aqparat quraldarynda da habarlanbady.
"Atalǵan aqparatty jarııalaǵan "О́temaqy ortalyǵy" dep atalatyn akkaýntta feık paraqshanyń barlyq belgileri baıqalady. Profılde keltirilgen málimetterde +52 kody bar baılanys telefony jazylǵan, bul Meksıkanyń kody. Al sýretke Qazaqstannyń eltańbasy qoıylǵan. Biraq jarııalanymdar lentasynda onyń ornynda buryn Belarýs Respýblıkasynyń eltańbasy bolǵanyn kórýge bolady. Bul kıberqylmyskerlerdiń áreketi", dep naqtylaıdy Stopfake.kz.
"О́temaqy ortalyǵy" arqyly ótemaqy tóleý – bul eski alaıaqtyq shema, QR memlekettik tehnıkalyq qyzmetiniń KZ-CERT sarapshylary ol týraly 2020 jyly halyqqa eskertken bolatyn. Demek, taralǵan aqparatqa senbegen jón.
