Statıstıkalyq málimetke súıensek, elimizde 30 jyl ishinde jol-kólik apatynan 83 myńnan astam adam qaza tapqan. Keıingi úsh jylda Qazaqstan joldaryndaǵy jol-kólik oqıǵalary jyl saıyn 6 paıyzǵa ósip keledi. Sarapshylardyń aıtýynsha, mundaı apattardyń 87 paıyzǵa jýyǵy júrgizýshilerdiń kinásinen bolady.
Jol-kólik apaty depýtattardyń da nazarynda. Májilistiń keıingi birneshe otyrysynda osy máselege qatysty depýtattyq saýal joldandy. Máselen Erbolat Saýryqovtyń keltirgen derekterine saı, 2023 jyldyń on aıynda elimizde 11myń 618 jol kólik oqıǵasy bolǵan. Saldarynan 1942 adamnyń ómiri qıylǵan. Jan tapsyrǵan jasóspirimder men balalar sany da az emes. Al ártúrli deńgeıdegi dene jaraqatymen túskenderdiń sany 14 myń 456 adamdy qurap otyr.
Al depýtat Naýryz Saılaýbaı buǵan júrgizýshilerdi daıarlaý deńgeıiniń tómendigi, qarapaıym jol qozǵalysy erejelerin bilmeý jáne júrgizýshi kýáligin alý oryndaryndaǵy sybaılas jemqorlyq sebep bolyp otyrǵanyn alǵa tartady.
«Birneshe ret emtıhan tapsyra almaǵan azamattar amal joqtan máseleni jeńil sheshýdiń joldaryn izdeıdi. Zańdy aınalyp ótýge tyrysady. Álbette munyń saldary sybaılas jemqorlyqqa alyp keledi. Kólik júrgizý kýáligin alý qıyndap ketkeni de halyq arasynda narazylyq týǵyzyp otyr. Bıyl Ishki ister mınıstriniń 20 shildedegi buıryǵymen júrgizýshi kýálikterin berý qaǵıdalaryna ózgerister engizilgenimen, sybaılas jemqorlyq deregin azaıtý máselesi áli sheshim tappaǵanyn kórip otyrmyz», deıdi N.Saılaýbaı.
