«Buǵan deıin Almaty, Shymkent qalalary men Qyzylorda, Aqtóbe, Almaty jáne Jetisý oblystarynda qylmystyq shemalar ashylǵan bolatyn. Túrkistan oblysy boıynsha Sybaılas jemqorlyqqa qarsy qyzmet Shardara jáne Saryaǵash aýdandarynyń bilim bólimderiniń býhgalterlerine qatysty sotqa deıingi tergeý júrgizýde. Olar bıýdjet qarajatyn asa iri kólemde júıeli negizde jymqyrdy dep kúdikteledi», dep habarlady Antıkor.
Tergeý málimetteri boıynsha, kúdikti tulǵalar 2020-2023 jyldar aralyǵynda bilim berý salasynda jumys istemeıtin tulǵalardyń shottaryna aqsha qarajatyn aýdarý, sondaı-aq mektep qyzmetkerlerine joǵary jalaqy esepteý arqyly shamamen 2,6 mlrd teńge soma jymqyrǵan.
Qazirgi ýaqytta Túrkistan oblysynyń bilim berý salasynan 17 adam qylmystyq jaýapkershilikke tartylýda, olardyń 4-i qamaýǵa alyndy.
Zalaldy óteý maqsatynda 39 jyljymaıtyn múlik, 44 avtomashına, zergerlik buıymdar jáne qylmystyq ister boıynsha aıyptalýshylardyń aqshalaı qarajattary buǵattaldy. Sonymen qatar tergeý barysynda Túrkistan oblysynyń Tekserý komıssııasynyń memlekettik aýdıtory áshkerelendi, ol Saryaǵash aýdanyndaǵy mektepterdiń birinde aýdıt barysynda anyqtalǵan jymqyrý faktilerin paıdakúnemdik nıetpen jasyrǵan.
Sondaı-aq Jetisý oblysynda uıymdasqan qylmystyq toptyń quramynda 2,5 jyl ishinde 4,4 mlrd teńge jymqyrǵan qalalyq bilim bóliminiń qyzmetkerlerine qatysty sotqa deıingi tergeý aıaqtaldy. Qylmystyq topqa basshy men onyń qaramaǵyndaǵylar, sondaı-aq orta mektep býhgalteri kirdi. Barlyǵy 13 adam.
Qylmystyq-prosestik kodekstiń 201-babyna sáıkes ózge aqparat jarııa etýge jatpaıdy. Konstıtýsııanyń 77-baby 3-tarmaǵynyń 1-tarmaqshasyna jáne Qylmystyq-prosestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.
