«Amanat» partııasy Shyǵys Qazaqstan oblystyq fılıalynda kitap ortalyǵynyń resmı ashylýyna óńirdiń zııaly qaýymy, bilim berý mekemeleriniń basshylary, stýdentter qatysqan. Al sharanyń qurmetti qonaǵy retinde aqyn Almasbek Ahmetbekuly shaqyryldy.
Bul ortalyqtyń kitaphanalardan bir ereksheligi – mundaǵy kitaptardy satyp ta alýǵa bolady. Deldalsyz, tikeleı baspadan jetken qundy kitaptardyń baǵasy qoljetimdi. Kelgen qonaqtar kitaphana ishin aralap, kitaptardy paraqtap ta shyqty. Kitaphanaǵa jýyqta ǵana «Abai» baspasynan shyqqan Alash ardaqtylary Mirjaqyp Dýlatuly, Maǵjan Jumabaevtyń jınaqtary, klassık jazýshylardyń povest, áńgimeleri, romandary jetkizilipti. Shetel jazýshylarynyń da kitaptaryn kózimiz shaldy.
– Prezıdent Qasym-Jomart Toqaev eldik máseleler aıtylǵan Ulttyq quryltaıda kitaphana jumysyna da zor mán berilýi kerektigin sóz etken edi. Nátıjesinde, jer-jerlerde osyndaı ortalyqtar ashylyp jatyr. Maqsatymyz – qoǵamnyń kitap oqý mádenıetin qalyptastyrý. «Kitap-Amanat» jobasy – partııamyzdyń qolǵa alǵan asa mańyzdy ulttyq jobasy. «Aýyl-Amanat», «Jer-Amanat» áleýmettik salaǵa baǵyttalsa, búgingi ortalyq halyqtyń rýhanı qýatyn jetildirýdi kózdeıdi, – dedi Shyǵys Qazaqstan oblystyq «Amanat» partııasy fılıalynyń tóraǵasy Saırangúl Jumadilova.
Osy tusta esep úshin emes, oqyrmanǵa tolymdy dúnıe usynýdy maqsat etken fılıal basshysy Saırangúl Ahmetkárimqyzynyń eńbegin de atap ótken jón.
Aqyn Almasbek Ahmetbekuly óz kezeginde Bul ortalyq adamnyń jan qajetin qanaǵattandyrý úshin jasalyp otyrǵanyn jetkizdi.
– Kitapsyz ult – ult bolmaıdy. «Eń kúshti ult – kitaby kóp ult, eń qaýipsiz memleket – kitaby kóp memleket» deıdi. Mádenıeti, bilimi joǵary, kitaby kóp memleketti jaý ala almaıdy. Bizde Japonııamen salystyrǵanda kitap óndirisi 300 ese tómen. Elimiz boıynsha «Amanat» partııasynyń 200-den astam ǵımaraty bar. Sol jerlerden mádenıet, parasat ortalyqtaryn ashyp, kitap almasatyn jerge aınaldyrýdy jón sanaǵan. Endigi másele – kitap óndirisin órkendetý. Árbireýimizdiń qolymyzda kitap júrýi kerek, – dedi.
Sonymen qatar óńirdiń zııaly qaýym ókilderi de jańa rýhanı ortanyń ashylyp jatqanyna qutty bolsyn aıtyp, jyly lebizderin bildirdi. Birqatar bilim mekemeleri demeýshilerdiń kómegimen tańdaǵan kitaptaryna ıe boldy.
О́SKEMEN
