Densaýlyq saqtaý vıse-mınıstri Vıacheslav Dýdnık forýmnyń Astana medısına ýnıversıtetiniń bazasynda ótýi kezdeısoq emes ekenin aıtty. Iá, rasynda, ozyq oıly, qarymdy jastar legi eldiń densaýlyq saqtaý júıesin damytatyn qozǵaýshy kúsh sanalady. Medısına salasyna keshe kelgen mamandar erteń medısınalyq ǵylymı ortalyqtar men uıymdardy basqarady. Pasıent qabyldap, myńdaǵan adamnyń ómirin saqtap qalýǵa kúsh salady. Vıacheslav Dýdnık salanyń úzdigi atanýdy kózdegen jastarǵa sapaly bilim alyp, únemi tájirıbe shyńdap otyrýǵa keńes berdi.
DDU Eýropalyq aımaqtyq bıýrosynyń dırektory Hans Klıýge forýmǵa onlaın qosylyp, quttyqtaý sóz sóıledi.
– Astana medısına ýnıversıtetinde jyl saıyn Dúnıejúzilik densaýlyq saqtaý uıymynyń qatysýymen mańyzdy is-sharalar ótip turady. Biz osyǵan qýanyshtymyz. Sebebi salada kadr daıarlaý isi udaıy jańaryp, jahandyq úderisterge oraılastyrýǵa tıis. Densaýlyq saqtaý salasyndaǵy jas kóshbasshylardyń forýmy – DDU qoldaıtyn «Jastardy jahandyq jumyldyrý» qozǵalysyna qosýǵa bolatyn taǵy bir is-shara, –dedi H.Klıýge.
DDU-nyń Qazaqstandaǵy eldik keńsesiniń basshysy Skender Syla eldegi 30 jasqa deıingi halyqtyń úlesi DDU-nyń Eýropalyq óńirindegi eń joǵary úlestiń biri ekenin, árbir ekinshi adam 30 jasqa tolmaǵanyn atap ótti. Ol elimizge qoǵamdyq densaýlyq saqtaýdaǵy ınnovasııalar kerek ekenin eske saldy. Buǵan qosa DDU-nyń Eýropalyq aımaqtyq bıýrosy jastardy tyńdaýǵa ári olarmen ózara baılanys ornatýǵa daıyn ekenin jetkizdi. Kóp uzamaı Skender Syla Astanada ótken alǵashqy medısınalyq-sanıtarlyq kómek jónindegi halyqaralyq konferensııany uıymdastyrýǵa kómek kórsetken Astana medısına ýnıversıtetiniń stýdentterine alǵyshat tabystady. Ol sózin túıindeı kele, forýmnyń saladaǵy jas kóshbasshylar úshin ózekti máselelerdi talqylap, ınnovasııalyq sheshimder usynatyn orynǵa aınalatynyna senim bildirdi.
Forýmda «Ulttyq ǵylymı medısınalyq ortalyq» AQ Basqarma tóraǵasy Abaı Baıgenjın jastardy ár kez belsendi ári salanyń shyńdalǵan kásibı mamany bolýǵa shaqyrdy. Izinshe Densaýlyq saqtaý salasyndaǵy jas kóshbasshylar qaýymdastyǵy tóraǵasy, Astana medısına ýnıversıtetiniń klınıkalyq jumys jónindegi prorektory Merýert Gazalıeva «Densaýlyq saqtaý júıesin qalyptastyrýdaǵy jas kóshbasshylar qaýymdastyǵyn uıymdastyrý tájirıbesi» taqyrybynda baıandama oqydy. Al paneldik pikirtalastar men sessııalar barysynda densaýlyq saqtaý salasyndaǵy ózekti taqyryptar, ozyq tájirıbeler talqylandy. Sonyń ishinde densaýlyq saqtaýdaǵy sıfrlandyrý men SMART- tehnologııalarǵa erekshe nazar aýdaryldy. Osylaısha, densaýlyq saqtaý salasyndaǵy jas kóshbasshylar qaýymdastyǵy tájirıbeli mamandarmen ashyq pikirlesti. Bul qadam keleshekte ınnovasııalyq ıdeıalardy júzege asyrýǵa yntalandyrý bolady dep seneıik.
