Sýretti túsirgen – Erlan OMAR, «EQ»
Abylaıhan Ábdirásh – dáriger-volonter. Onyń 2-kýrsta ýnıversıtet janynan qurǵan shaǵyn stýdenttik keńesi qazir «Medısına jastary» respýblıkalyq qoǵamdyq birlestigine aınaldy. Qanatynyń astynda 3 myńnan asa volonter bar. Uıym eldegi 16 myńnan asa muqtaj janǵa kómek qolyn sozyp, densaýlyq saqtaý jáne halyqtyń medısınalyq saýatyn arttyrý maqsatynda 250-den astam áleýmettik mańyzy bar is-shara ótkizgen.
– Abaı atamyz «Paıda oılama, ar oıla» degen. Iаǵnı ár azamat «Qoǵamnyń damýyna qalaı úles qosamyn?» dep oılanǵany abzal. Biletinimizdi ózimizden keıingi býynǵa úıretsek, adal eńbek etsek – arymyz da taza. Astana medısına ýnıversıtetinde oqyp júrgenimde-aq otandastaryma kómektesýdi kózdegen edim. Mine, volonterlikpen aınalysqanyma 8 jyldan asty. 2020 jyly bastalǵan pandemııa medısına men densaýlyq saqtaý bizdiń eldiń árbir azamaty úshin eń mańyzdy salalar ekenin kórsetti. О́kinishke qaraı, elde medısına mamandary tapshy. Demek medısınalyq eriktilikti damytý qajet. Ásirese aımaqtyq densaýlyq saqtaý salasyna sertıfıkattalǵan medısınalyq volonterlerdi daıarlaý kerek. Olar dárigerler men medbıkelerdiń kómekshileri retinde naýqastarǵa kómek kórsetip, turǵyndar arasynda profılaktıkalyq jumystardy júrgize alady. Osylaısha, eldiń órkendeýine az da bolsa úles qosa alamyz, – dedi «Medısına jastary» respýblıkalyq qoǵamdyq birlestiginiń tóraǵasy Abylaıhan Ábdirásh.
Bizdegi janashyrlardyń jurtqa jasaǵan jaqsylyǵy az emes. Kóbiniń ıgi isteri kózden tasa qalady. О́z erkimen, júrek qalaýymen elge járdemdesip júrgen jannyń taǵy biri – Ásııa Quljanova. Alǵash oblystyq «Qyzyl Aı qoǵamy» qoǵamdyq birlestiginde jetekshi bolyp, qınalǵanǵa qol ushyn sozǵan volonter, qazir jeke top quryp, halqymyzdyń qanynda bar ıgi dástúrdi nasıhattap júr.
– Volonterlik joldaǵy ıgi ister halqymyzdyń birligin bekemdeı túsedi. Osy tusta úkimettik emes uıymdarǵa memlekettiń qoldaýy mańyzdy. Biz áleýmettik osal toptar ókilderine turaqty járdem berip, júzdegen janǵa kómek kórsettik. Sondaı-aq quqyq qorǵaý organdary qyzmetkerlerimen birge qoǵamdyq qaýipsizdikti qamtamasyz etý maqsatynda birneshe márte reıdke de shyqtyq. Bári volonterlikti tegin qyzmet, járdemdesý dep biledi. Shynyna kelsek, ár azamat erikti bolyp kómektesýi kerek. Kómekke muqtaj adamdar kóp. Másele tek materıaldyq kómekte emes. Jyly sóz aıtyp, qıyn sátte qoldaǵanyńyzdyń ózi – qamqorlyq. Kúndelikti jumysta «bári jaqsy bolady» degen bir aýyz sózdi estigisi keletinder kóp. Sondyqtan «volonterler» dep jaýapkershilik pen mindetti shektemegen jón. Bul barlyǵymyz birge jumyla isteıtin jumys, – dedi «Batys» volonterlik tobynyń jetekshisi Ásııa Quljanova.
Eseppen emes, qoǵamǵa áleýeti jetkenshe kómekteskenderdi elep-eskerip, alǵys aıtýdy Prezıdent te nazardan tys qaldyrǵan emes. Maýsym aıynda ótken Halyqaralyq volonterler forýmynda Memleket basshysy eriktiler qoǵamda aıryqsha ról atqaratynyn aıtyp, volonterlik pen qaıyrymdylyq dástúrin nyǵaıtý úshin birneshe keshendi is-shara qabyldaýdy usynǵan.
«Osy saladaǵy strategııalyq baǵyttardy naqty kórsetetin jańa Jol kartasyn ázirleý kerek. Atalǵan qujat volonterlik qozǵalysqa tyń serpin berip, onyń taıaý jyldardaǵy damýynyń basty baǵyttaryn aıqyndaýǵa tıis. Ekinshiden, eriktilik pen qaıyrymdylyq isin esepke alatyn júıeni kezeń-kezeńimen engizý qajet. Bul bastama volonterlik qozǵalysty yntalandyrý úshin zańnamalyq deńgeıde tıimdi sharalar qabyldaýǵa múmkindik beredi. Úshinshiden, volonterlik qozǵalysty uzaqmerzimdi grant berý arqyly yntalandyrý kerek. Bul rette memlekettik jáne jekemenshik grant berýshiler arasynda turaqty seriktestik ornatyp, otandyq jáne halyqaralyq donorlardyń bir-birimen nátıjeli yntymaqtastyǵyn qalyptastyrý mańyzdy. Tórtinshiden, volonterlik jáne qaıyrymdylyq isterdi ınstıtýttyq turǵyda qoldaý ınfraqurylymyn dáıekti túrde damytqan jón. Ol úshin volonterlerdiń ulttyq jáne aımaqtyq deńgeıdegi front-ofısiniń uıymdastyrýshylyq, tehnıkalyq jáne kadrlyq áleýetin kúsheıtý qajet. Besinshiden, volonterlik qyzmet salasyndaǵy halyqaralyq yntymaqtastyqty odan ári nyǵaıtýǵa jáne ilgeriletýge erekshe nazar aýdarý qajet», dedi Qasym-Jomart Toqaev.
Forýmda qaýzalǵan taqyryptyń biri tótenshe jaǵdaı kezindegi volonterlerdi saqtandyrý máselesi edi. Ulttyq volonterler jelisiniń atqarýshy dırektorynyń orynbasary Aıbek Dosymbetovtiń sózinshe, búginde «Volonterlik qyzmet týraly» zańǵa memleket tarapynan ózgerister men túzetýler engizý kózdelip otyr.
– Qazir volonterlikti damytý jol kartasy ázirlenip jatyr. Qujat 2024 jyldyń basynda qabyldanady degen úmit bar. Mınıstrlikke óz usynystarymyzdy jetkizdik. Basty aksent – volonterliktiń túrli salalaryn damytýdyń júıesin jasaqtaý. Máselen, Densaýlyq saqtaý mınıstrliginiń aıasynda dáriger volonterlerdi oqytý qolǵa alynbaqshy. Osylaısha, ózge de sala ókilderine arnaıy tapsyrma berilip jatyr. О́zderi oqytyp, arnaıy sertıfıkattaryn taǵaıyndaıtyn múmkindikterdi oılastyrýdamyz. Arasynda stýdent volonterlerge qandaı kómek qarastyrylýy kerek degen syndy saýaldar jiti taldanady. Sondaı-aq aýdan, aýyl bolsyn respýblıkanyń túkpir-túkpirindegi volonterlik uıymdardyń kez kelgeni volonterlik jobany ıgerýge ótinim berý jaǵdaıyn, tótenshe jaǵdaı kezindegi eriktilerge qyzyl aımaqqa kirip, qyzmet kórsete alatyn arnaıy kýálik berýdi qarastyryp jatyrmyz, – dedi ol.
Qazir elimizde 680 volonterlik uıym bar. Al turaqty volonterlikpen aınalysatyn adamdar sany 160 myńnan asyp jyǵylady. Ári barlyq aımaqta 20 front-ofıs jumys istep tur. Demek kez kelgen otandasymyz volonterler tobyna múshe bolyp, paıdaly iske óz úlesin qosa alady.
