Foto: Aqorda_resmi
«Bul jumysty mindetti túrde sońyna deıin jetkizýimiz kerek. Áıtpese, halyqqa zııany kóp. Ekologııa máselesi óte ótkir ári ózekti. Sondyqtan bul máselege basa mán berý qajet», dedi Prezıdent.
Budan bólek, iri kompanııalardyń ókilderi Memleket basshysyna ózderiniń ınvestısııalyq jobalaryn tanystyrdy.
Atap aıtqanda, ERG bas dırektory Serik Shahajanov Aqtóbe oblysynda Ekologııalyq strategııanyń iske asyrylýy jóninde baıandady. Osy maqsatta 2030 jylǵa deıin 228 mıllıard teńge kóleminde ınvestısııa quıý josparlanyp otyr. Atalǵan Strategııa sheńberinde Aqtóbe ferroqorytpa zaýytyndaǵy №1, 2 balqytý sehtarynyń gaz tazartý júıesin jańǵyrtý jumystary aıaqtaldy.
«SNPS-Aqtóbemunaıgaz» AQ bas dırektory Lı Shýfen Qasym-Jomart Toqaevqa munaı men gazdy daıyndaý isinde zamanaýı tehnologııanyń eń joǵary standarttaryna saı keletin Jańajol munaı-gaz óńdeý keshenine qarasty Úshinshi gaz óńdeý zaýytynyń (GО́Z-3) birinshi, ekinshi jáne úshinshi kezekte júzege asyrylatyn jobalary týraly aıtty. Jalpy ınvestısııa kólemi – 3,5 trıllıon teńge.
Eni Plenitude Arm Wind kompanııasynyń basqarýshy dırektory Aleks Stıllavato Qasym-Jomart Toqaevqa Qazaqstan aýmaǵynda iske asyrylǵan jobalar týraly aqparat berdi. Atap aıtqanda, kásiporyn Aqtóbe oblysynda «Badamsha-1», «Badamsha-2» jel elektr stansııalarynyń, Túrkistan oblysy Sháýildir kentiniń janynda qýaty 50 MVt bolatyn birinshi kún elektr stansııasynyń qurylysyn júzege asyrǵan. Sondaı-aq ol Mańǵystaý oblysy Jańaózen qalasynyń mańynda «QazMunaıGaz» UK aksıonerlik qoǵamymen birlesip, qýaty 250 MVt bolatyn Jańartylatyn energııa kózderi+Gaz gıbrıdti elektr stansııasynyń jobasy ázirlenip jatqanyn aıtty.
KazFeltec JShS basshysy Erlan Jańabergenov Memleket basshysyna qoı júninen ekologııalyq taza ári jylý saqtaıtyn materıaldar shyǵaratyn zaýytty iske qosý jobasyn tanystyrdy. Nysanǵa jalpy kólemi 5,3 mıllıard teńge ınvestısııa salý kózdelip otyr.
AqtobeCem kompanııasynyń bas dırektory Stanıslav Sherbakov Qasym-Jomart Toqaevqa Aqtóbe oblysynda jalpy somasy 70 mıllıard teńge bolatyn sement klınker óndiretin zaýyttyń jobasyn usyndy.
«QazaqBıtým» kompanııasynyń baqylaýshy keńesiniń tóraǵasy Bekjan Mamyt Prezıdentke somasy 32,2 mıllıard teńgeni quraıtyn bıtým zaýyty-termınalyn salý jobasy týraly aıtty.
Kezdesý sońynda Memleket basshysy kásipkerlerdiń qolǵa alǵan jobalarynyń tabysty júzege asyrylýyna tilektestik bildirdi.
