Jańatalap – Jaıyq ózeni jaǵasyndaǵy balyqshylyqty kásip etýshiler turatyn aýyldyń biri. Kezinde bul aýyldyń irgesin qalaǵan jandar buryn Isataı aýdanynda turǵan. Keıin oblys ortalyǵyna taıaý mańǵa kóshirilgen. Zaman lebimen jańarǵan, birneshe urpaq almasqan aýyldyń turǵyndary tarıhı «Egemen Qazaqstan» gazetinde jumys istegen Nurıden Muftah pen basylymnyń osy óńirdegi menshikti tilshisi bolǵan Qazıhan Qabdeldiń adamı, shyǵarmashylyq qasıeti týraly áli kúnge áńgimeleıdi.
Aýyl turǵyndary belgili qalamgerdiń esimin kóshege berý týraly usynysty qýana quptady. Atyraý qalasy ákiminiń orynbasary Nurjan Ermuhanovtyń aıtýynsha, elge tanymal tulǵalardyń esimin este qaldyrý – keıingi urpaq úshin ónege bolarlyq is.
«Jýrnalıst Nurıden Muftah esimi tek bir aýylǵa, bir óńirge ǵana emes, tutas elge keńinen tanymal bolǵan. Qalamgerdiń esimi jańadan boı túzegen kóshege berildi. Demek táýelsiz elimizben birge Jańatalap aýyly da keń qanat jaıyp keledi. Endi qalamgerdiń darhan kóńilimen, batyl minezimen kóptegen adamǵa qoldaýyn kórsetip, qoǵamǵa adal qyzmet etken úlgisin jas býynǵa dáripteımiz», dedi N.Ermuhanov.
Qalamgerdiń týysqandary atynan Amangeldi Qýanalıev estelik aıtty. El esindegi jýrnalıst eńbek jolyn Qaraǵandy óńirindegi shahtada shahterdiń kómekshisi bolyp bastaǵan. Keıin jýrnalıstik jolǵa túpkilikti bet burǵan. О́mirden ótkenge deıin quqyq taqyrybyna qalam tartyp, kúrdeli qoǵamda ádilettilik joqshysy boldy.
Atyraý oblysy
